Costco kaupir landsvæði undir verslun og bensínstöð

Bandaríski smásölurisinn Costco og Garðabær hafa undirritað samning sem sem tryggir Costco landsvæði og byggingu verslunar og bensínstöðvar í Kauptúni í Garðabæ.

Stefnt er að opnun sumarið 2016 en vöruhús Costco í Garðabæ mun einnig bjóða upp á þjónustu á borð við apótek, sölu sjóntækja og sjónmælingu, dekkjasölu og dekkjaverkstæði, bakarí og sælkeraverslun.

Haft er eftir Steve Pappas, aðstoðarforstjóra og framkvæmdastjóra yfir Bretlandi og Íslandi, að aðstandendur fyrirtækis sé spenntir fyrir opnuninni á Íslandi.

„Við hlökkum til að vinna að því með Gunnari Einarssyni bæjarstjóra og bæjaryfirvöldum Garðabæjar að gera þetta verkefni að veruleika eins fljótt og auðið er til að geta svo opnað verslunina sumarið 2016. Við munum ráða 160 starfsmenn til starfa í fyrstu en þeir verða svo orðnir að minnsta kosti 250 eftir þrjú ár, þegar reksturinn er kominn betur af stað. Við munum líklega hefja ráðningar starfsmanna í byrjun árs 2016,“ segir Pappas í tilkynningu.



Selja vörur undir eign vörumerki

Costco Wholesale Corporation rekur alþjóðlega keðju vöruhúsa, aðallega undir nafninu „Costco Wholesale”, sem bjóða upp á víðtækt vöruúrval.

Dæmi um vöruflokka eru matvörur, sælgæti, heimilistæki, sjónvörp, aukahlutir fyrir bíla, dekk, leikföng, byggingarvörur, íþróttavörur, skartgripir, úr, myndavélar, bækur, húsbúnaður, fatnaður, snyrtivörur, tóbak, húsgögn og ritföng.

Í Costco er einnig að finna vörur undir vörumerkinu Kirkland Signature, sem er eigið merki verslunarinnar. Undir merkinu selur fyrirtækið vörutegundir á borð við húsbúnað, farangur, dýramat og dýravörur, bleyjur, þurrkur, kaffi, vín og snakk, auk úrvals af fersku kjöti, mjólkurvörum, sælkeravörum, ferskum og frosnum mat og brauðmeti.

Costco er aðeins opin meðlimum og býður upp á þrjár tegundir aðildar; fyrir einstaklinga, fyrirtæki og svo úrvalsaðild. Fyrirtækjaaðild er ætluð fyrirtækjum af öllum gerðum, þó með áherslu á að sinna þörfum smærri fyrirtækja. Einstaklingsaðild er ætluð öllum öðrum. Engar takmarkanir hvíla á aðildinni að undanskildu árgjaldi, en upphæð gjaldsins hefur enn ekki verið ákveðin. Árgjaldinu er ætlað að standa straum af óbeinum viðskiptakostnaði og gera að verkum að hægt sé að selja vörur á sem lægstu verði. Meðlimir Costco á heimsvísu eru nú yfir 71 milljón talsins.