Bjórspa Kalda með útsýni yfir Hrísey

Bjórspa bruggverksmiðjunnar Kalda á Árskógasandi, sem Vísir greindi frá hér á liðnu ári, verður áþreifanlegra með hverjum deginum en eigendur verksmiðjunnar hafa nú tryggt sér lóð fyrir starfsemi heilsulindarinnar.

Þau Sigurður Bragi Ólafsson, yfirbruggari hjá Kalda, og Agnes Sigurðardóttir, eigandi Kalda, sögðu frá því í viðtali á sjónvarpsstöðinni N4 sem nú er aðgengilegt á vefsíðu stöðvarinnar.

Þar útskýrðu þau hugmyndir sínar fyrir heilsulindina en þar mun fólki meðal annars gefast kostur á að bregða sér í bjórbað.

Hugmynd eigenda Bruggsmiðjunnar gengur út á að sjór og Kaldi séu hitaðir í þar til gerðu kari.

„Bjórinn er svo gríðarlega hollur fyrir húðina, og brugghúsið er við sjóinn, þannig að við munum nota hreinsaðan sjó og Kalda til að búa til spa-paradís,“ sagði Agnes Sigurðardóttir í samtali við Vísi í vetur.  

Hún segir að slíkar bjórheilsulindir séu þekktar víða í Evrópu, ekki síst í Tékklandi, og eru þá oftar en ekki í tengslum við brugghús eða verksmiðjur eins og þeirri sem Kaldi rekur í Eyjafirði.

Hún segir að fyrirhugað sé að reisa um 400 fermetra bjálkahús sem annars vegar samanstæði af fyrrnefndri bjórheilsulind og hins vegar af veitingastofu. 

Agnes tekur fram að fyrirtækið hafi alltaf verið byggt upp í smáum skrefum og að skynsemin verði áfram höfð að leiðarljósi. Bruggsmiðjan var stofnuð í desember 2005 og hagnaður af rekstri hennar nam tæpum 40 milljónum króna á síðasta ári.

„Við fáum hingað gríðarlega mikið af gestum en það vantar meiri afþreyingu á staðinn og því ætlum við að fara í þessar framkvæmdir.“

„Það er enginn lygi og kannski klisja að segja það en bjór hefur rosa góð áhrif á bæði innri og ytra byrði líkamans,” sagði Sigurður í samtali við N4 en viðtalið í heild sinni má sjá hér að neðan.