Virðing veitti styrki til samfélagsmála

Árleg styrkveiting úr samfélagssjóðum Virðingar fór fram í sjöunda sinn þann 19. júní síðastliðinn. Samfélagssjóðir Virðingar eru tveir, AlheimsAuður og Dagsverk Virðingar.

AlheimsAuði er ætlað að hvetja konur til athafna og frumkvæðis, einkum í þróunarlöndunum. Tvö verkefni hlutu styrki AlheimsAuðar að þessu sinni:

Margrét Ingadóttir fékk styrk til að stofna nýtt barnaheimili í Nepal en hún hefur rekið þar eitt barnaheimili um nokkurt skeið.

Tau í Tógó fékk einnig styrk og er það góðgerðarfélag sem kaupir vörur af saumastofu heimili Divine Providence í Aneho, Togo. Saumastofan er rekin af heimili fyrir munaðarlaus börn og er þannig í senn tekjulind fyrir heimilið og nokkurs konar iðnskóli fyrir elstu börnin á heimilinu og úr nágrenninu.

Dagsverk Virðingar er samfélagsverkefni starfsmanna Virðingar hf. Það felst í því að starfsmenn gefa andvirði launa sinna í einn dag á ári í innlent málefni. Ennfremur vinna allir starfsmenn sem nemur einum vinnudegi á ári í þágu góðs málefnis.

Styrkir Dagsverksins skiptust í þetta sinn í sjö hluta, annars vegar peningastyrki og hins vegar vinnuframlag.

Hestamannafélagið Hörður, fræðslunefnd fatlaðra, peningastyrkur til að halda reiðnámskeið fyrir fólk með fötlun.

Sambýlið Smárahvammi 3, Hafnarfirði, veittur er styrkur til kaupa á heitum potti, styrkurinn er veittur í samstarfi við Hafnarfjarðarbæ og fyrirtækið Trefjar sem staðsett er í Hafnarfirði.

Fjóla, félag fólks með samþætta sjón-og heyrnarskerðingu, peningastyrkur til að tryggja fólki aðgengi að faglærðum túlkum.

Leikskólinn Sólborg, peningastyrkur til kaupa á rólu sem fjögur börn geta rólað sér saman í. Leikskólinn hefur þá sérstöðu að bjóða alvarlega fötluðum börnum uppeldi og nám við hlið ófatlaðra.

Rótin- félag um málefni kvenna með áfengis – og fíknivanda, veittur er styrkur fyrir ráðstefnu með yfirskriftina konur, fíkn, áföll og meðferð.

GFF eða Gróður fyrir fólk í Landnámi Ingólfs, peningastyrkur til gera samtökunum kleift að starfrækja verkefnið LAND-NÁM. Verkefnið LAND-NÁM er samstarfsverkefnið með skólum á starfsvæði samtakanna á suðvesturhorninu en í dag eru 13 skólar í samstarfi um verkefnið.

Vinnuframlagið fer til Sambýlisins Smárahvammi 3, Hafnarfirði, en þau fá aðstoð við viðhald og vinnu við garð og hús.

Í tikymmimgu frá Virðingu segir að það sé von fyrirtækisins að styrkirnir nýtist styrkþegum vel í starfi þeirra.