Secret Solstice býður dýrustu VIP miða í heimi á 26 milljónir króna

Íslenska tónlistarhátíðin Secret Solstice er með til sölu dýrustu VIP miða í heimi. Um er að ræða tvo VIP miða sem seldir verða saman á  200 þúsund dollara eða um 26 milljónir íslenska króna.

Gera á vel við gestina. Þeir munu gista í fimm herbergja glæsiíbúð í Reykjavík og hafa aðgang að þyrlu sem mun fljúga með gestina hvert sem þeir vilja fara. Þyrlan mun m.a. fljúga með gestina í Bláa lónið þar sem þeir munu fá einkaaðgang að lóninu samkvæmt Ósk Gunnarsdóttur kynningarfulltrúa hátíðarinnar.

Auk þess munu báðir miðahafarnir fá aðgang að sínum persónulega aðstoðarmanni sem og einkabílstjóra sem hægt verður að hringja í allan sólarhringinn.

Miðahafarnir munu einnig hafa aðgang að 30 metra langra snekkju sem lagt verður í Reykjavíkurhöfn. Einstaklingarnir munu geta haldið einkapartý um borð í snekkjunni, farið í golf eða á „jet ski“ að sögn Óskar. Þá mun kokkur á vegum hátíðarinnar elda ofan í gestina.



Vongóð um að miðarnir seljist

Miðarnir voru auglýstir til sölu í gær. Ósk segir að aðstandendur hátíðarinnar séu vongóðir um að miðarnir seljist en enginn hafi haft samband enn sem komið er. „Það er svo mikið af fólki þarna úti sem á svo mikið af peningum,“ segir Ósk.

„Við bíðum spennt við símann,“ bætir hún við. „Fyrir fólk sem á helling af peningum er þetta einstök upplifun. Að koma til Íslands og vera „trítuð“ eins og konungsfjölskylda og þurfa ekki að pæla í neinu. Við plönum allt fyrir þetta fólk,“ segir hún.