Harmageddon

Slash aftur í Guns N' Roses?

Orri Freyr Rúnarsson skrifar
Slash gæti snúið aftur í Guns N' Roses
Slash gæti snúið aftur í Guns N' Roses Vísir/Andri Marinó
Gítargoðsögnin Slash virðist vera að mildast í afstöðu sinni varðandi að ganga aftur til liðs við Guns N‘ Roses og í viðtali á dögunum sagðist hann ekki vilja útiloka neitt í þeim efnum. Slash hætti í hljómsveitinni árið 1996 og hefur frá þeim tíma alltaf neitað þeim sögusögnum að hann muni ganga aftur til liðs við hljómsveitina. Í viðtali við CBS sagði hann að stöðugar umræður hefðu verið um framtíð Guns N‘ Roses síðustu 18-19 árin en hann hefði aldrei pælt mikið í því sjálfur. Nú væri hinsvegar spennan á milli hans og Axl Rose að mestu horfin og hann gæti því hugað sér að starfa aftur með söngvaranum. Að lokum sagði Slash að aðdáendur myndu trúlega elska að fá hann aftur í hljómsveitina og ef allir væru tilbúnir að gera þetta af réttum ástæðum gæti það orðið skemmtilegt.

Þingkosningar fóru fram í Bretlandi í gær og stefnir allt í yfirburðarsigur Íhaldsflokksins, þvert gegn flestum spám. Fjölmargir tónlistarmenn hafa tjáð sig um niðurstöðurnar á Twitter og virðast flestir harmi slegnir yfir niðurstöðunum. Tim Burgees, söngvari The Charlatans, lýsti flokknum m.a. sem lélegri hljómsveit sem enginn viðurkennir að hlusta á en virðist samt alltaf vera á vinsældarlistum. Af öðrum sem kvörtuðu undan niðurstöðunni má nefna Thom Yorke, Rou Reynolds, söngvara Enter Shikari, Alex Kapranos, söngvari Franz Ferdinand og fleiri og fleiri.

Mumford and Sons
Marcus Mumford, forsprakki Mumford and Sons, segist hafa gaman af fólki sem er nógu hugrakkt til að labba upp að honum og segjast hata hljómsveitina hans. Sagðist Mumford hafa verið á tónleikum á dögunum þegar að maður vatt sér upp að honum og sagðist hata tónlistina hans og bætti svo við að hún væri ógeðsleg. Marcus ákvað þó að svara kurteisislega og þakkaði manninum fyrir að deila sínu áliti. Þá bætti hann við að söngvarinn væri örugglega mjög fínn, en tónlistin hans væri hræðileg. Sagði söngvarinn að honum þætti alltaf vænt um að fólk segði þetta við hann í stað þess að skrifa undir nafnleysi á internetinu. En allt stefnir í að þriðja breiðskífa Mumford and Sons nái efsta sæti breska vinsældarlistans nú um helgina.

Hinn dularfulla gríska kona sem Pulp syngja um í laginu Common People er mögulega komin í leitirnar og er það þá engin önnur en Danae Stratou, eiginkona gríska fjármálaráðherrans. En það er dagblaðið Athens Voice sem greinir frá. Segir blaðið að hún hafi stundaið nám í Bretlandi á árunum 1983-1988 í sama skóla og á sama tíma og Jarvis Cocker, söngvari Pulp. En miklar vangaveltur hafi verið uppi um hver þessi dularfulla kona sem Cocker söng um er í raun og veru.



Velkomin á Vísi. Þessi vefur notar vafrakökur. Sjá nánar.