Hafa safnað yfir tíu milljónum

Nú hafa safnast yfir tíu milljónir króna í söfnun Bestseller fyrir Krabbameinsfélagið og þrjú alþjóðleg góðgerðarmál. Allur söluágóði í verslunum fyrirtækisins í dag rennur óskiptur til góðgerðarfélaganna fjögurra.

Bestseller rekur verslanirnar Vila, Jack & Jones, Name it, Selected og Vero Moda sem verða opnar í 12 klukkustundir í dag, frá 9 í morgun til 21 í kvöld. Átakið er í öllum verslunum Bestseller í heiminum en yfir 3.000 verslanir eru starfræktar í 38 mismunandi löndum.

Á heimsvísu er söfnunin komin vel yfir einn og hálfan milljarð króna eða 11 milljónir evra.