Icelandair gæti tapað 1,3 milljarði

Eigið fé Icelandair gæti lækkað um 1,3 milljarð í kjölfar úrskurðar yfirskattanefndar síðastliðin miðvikudag.

Yfirskattanefnd hafnaði þá kröfu Icelandair um að úrskurður Ríkisskattstjóra frá 18. desember 2013 yrði felldur úr gildi. Í úrskurði Ríkisskattstjóra var gjaldfærður fjármagnskostnaður gjaldárin 2008-2012 lækkaður með vísan til dóms Hæstaréttar í máli Toyota á Íslandi ehf. gegn íslenska ríkinu (nr. 555/2012.)

Það hefur í för með sér að yfirfæranlegt tap Icelandair minnkar um allt að 6,4 milljarða króna. Í tilkynningu til Kauphallar Íslands kemur fram að stjórnendur Icelandair munu yfirfara forsendur yfirskattanefndar og meta hvort að skjóta eigi málinu til Héraðsdóms Reykjavíkur.