900 milljónir í kaupauka

Arion banki gjaldfærði 542 milljónir króna á síðasta ári vegna kaupauka til starfsmanna en þetta kemur fram í ársreikningi bankans. Greiðslur vegna kaupauka árið áður námu 494 milljónum króna og 78 milljónum fyrir árið 2012.

Hjá Íslandsbanka voru gjaldfærðar 358 milljónir vegna kaupauka til starfsfólks fyrir árið 2014 en 271 milljónir árið áður. Samtals er því um 900 milljónir að ræða hjá bönkunum tveimur.

Hjá Landsbankanum er ekkert sérstakt kaupaukakerfi en árið 2013 fengu starfsmenn bankans aftur á móti tæplega eitt prósent hlut í bankanum. Reglur Fjármálaeftirlitsins segja til um að fjármálafyrirtækin geta samt sem áður ekki greitt út allan kaupaukann fyrr en eftir þrjú ár. 

Reglur um kaupaukakerfi fjármálafyrirtækja voru samþykktar af stjórn Fjármálaeftirlitsins árið 2011.

Í reglunum segir að á ársgrundvelli megi kaupauki starfsmanns ekki nema hærri fjárhæð en 25 prósent af árslaunum viðkomandi án kaupauka. Fresta skuli greiðslu hluta af kaupauka um að lágmarki þrjú ár, þannig að unnt sé að taka tillit til sveiflna í viðskiptalífinu og hagkerfinu sem geta haft áhrif á árangur.

Kristján Kristjánsson, upplýsingafulltrúi Landsbankans, segir í samtali við fréttastofu að starfsfólk bankans megi ekki selja sinn hlut fyrr en eftir þrjú ár og vísar til reglna FME.

Sjá einnig: 100 starfsmenn Arion banka skipta með sér tæpum 400 milljónum

Reglurnar leggja einnig bann við tryggðum kaupauka, þ.e.a.s. kaupauka sem starfsmaður fær óháð árangri í starfi. Einnig er mælt fyrir um lækkun, afturköllun eða endurgreiðslu kaupauka þegar mælikvarða um árangur í starfi er ekki náð.

Nú liggur fyrir frumvarp inn á þingi frá Bjarna Benediktssyni fjármálaráðherra um að bónusgreiðslur nemi í mesta lagi 25,5 prósent af árslaunum hjá yfirstjórn og lykilstarfsmönnum fjármálafyrirtækja.

Í Kastljósi RÚV í gærkvöldi kom fram að Samtök fjármálafyrirtækja leggjast gegn frumvarpinu á vissum sviðum og vilja geta greitt allt að 200 prósent árslauna í kaupaauka eins og evrópskur lagarammi segir til um.