Jordan Spieth fór á kostum á fyrsta hring á Augusta

Aðstæður á Augusta National vellinum voru frábærar í dag en skor kylfinga á fyrsta hring á Masters mótinu var með allra besta móti.

Það lék þó enginn betur heldur en Bandaríkjamaðurinn ungi Jordan Spieth sem fór hreinlega á kostum og kom inn á 64 höggum eða átta undir pari.

Spieth sýndi allra sínar bestu hliðar, sérstaklega á flötunum en hann fékk níu fugla á hringnum og aðeins einn skolla.

Fjórir kylfingar deila öðru sætinu á fimm höggum undir pari en það eru þeir Ernie Els, Justin Rose, Charley Hoffman og Jason Day.

Besti kylfingur heims, Rory McIlroy, lék fyrsta hring á 71 höggi eða einu undir pari. Hann átti í miklum erfileikum í kring um flatirnar en boltaslátturinn hjá þessum frábæra kylfingi bjargaði honum trekk í trekk.

Augu margra voru þó á Tiger Woods sem lék sinn fyrsta hring í atvinnumannamóti síðan í byrjun febrúar en hann kom inn á 73 höggum eða einu yfir pari og er jafn í 41. sæti.

Woods hefði þó hæglega getað leikið á mun fleiri höggum ef stutta spilið hjá honum hefði ekki verið í góðu standi en hann bjargaði sér frábærlega á köflum úr erfiðum aðstæðum.

„Hef verið að undirbúa mig undir þetta mót allt árið“

Jordan Spieth hefur verið í mjög góðu formi að undanförnu en í síðustu þremur mótum á PGA-mótaröðinni hefur hann sigrað eitt og endaði í öðru sæti í hinum tveimur. Hann sagði að aðstæðurnar hefðu hjálpað sér í dag.

„Flatirnar voru mjúkar í dag og það hjálpaði mér að stjórna boltanum á þeim. Að spila svona góðan hring á fyrsta degi Masters er alveg magnað og ég hlakka til helgarinnar.“

Spieth var í toppbaráttunni á Masters mótinu í fyrra en hann er óhræddur við að viðurkenna hversu mikilvægt mótið er fyrir hann.

„Tímabilið hjá mér hefur snúist um að vera í mínu besta formi hérna á Augusta. Það má eiginlega að segja að ég hafi verið að undirbúa mig undir þetta allt árið.“

Þessi hæfileikaríki kylfingur má þó ekki fara fram úr sér en eins og alltaf á Masters eru margir heimsklassa kylfingar ofarlega á skortöflunni, meðal annars Dustin Johnson og Phil Mickelson á tveimur undir pari og Spánverjinn Sergio Garcia á fjórum undir.

Tiger Woods verður meðal fyrstu manna til þess að hefja leik á morgun og búist er við góðum aðstæðum fram að hádegi á öðrum hring. Þá gæti gert mikið rigningaveður sem gæti haft áhrif á leik.

Annar hringur verður í beinni útsendingu á Golfstöðinni á morgun frá klukkan 19:00.