Amazon fær leyfi fyrir tilraunasendingum með drónum

Amazon hefur fengið leyfi frá bandarískum flugmálayfirvöldum, FAA, til að hefja prófanir utandyra á sendinum á pökkum frá fyrirtækinu með drónum. The Verge greinir frá.

Amazon tilkynnti áætlanir um að senda pakka heim að dyrum með drónum í desember árið 2013. Félagið hefur átt í deilum um leyfi fyrir slíkri starfsemi við FAA og hótaði fyrirtækið í síðasta ári að flytja starfsemi sína úr landi yrði stofnunin ekki við kröfum þeirra.

Skilyrði fyrir tilraununum nú er að drónarnir séu í sjónlínu flugmanna sem stýra drónunum. Þeir sem stýra drónunum þurfa einnig að hafa flugmannsréttindi og skila inn heilbrigðisvottorði. Því er talsvert í land áður en Amazon fær leyfi fyrir að senda pakka með drónum heim að dyrum.