Spá 1,1% aukningu hagvaxtar vegna meiri loðnukvóta

Hagfræðideild Landsbankinn spáir því að hagvöxtur muni aukast um 1,1 prósent vegna hækkunar á leyfilegum hámarksafla loðnu um 320 þúsund tonn, úr 260 þúsund tonnum í 580 þúsund tonn.

Bankinn segir veiðina á síðasta ári hafa verið afar slaka þar sem einungis veiddust 112 þúsund tonn. Því gæti verið um mikla breytingu að ræða veiðist allt aflamarkið.

Landsbankinn spáði 4,3 prósent hagvexti á árinu 2015 í nóvember síðastliðnum. Aukin loðnuveiði, gætu því, að öðru óbreyttu, leitt til þess að hagvöxtur yfir árið í heild verði 5,4 prósent.



Óvissa um nákvæð áhrif

Þó telur Landsbankinn að töluverð óvissa sé um um nákvæm áhrif aukinna loðnuveiða á hagvöxt. „Sú óvissa felst m.a. í því hversu mikið af hrognum tekst að vinna úr loðnunni sem veiðist en þar er um að ræða töluvert verðmæta afurð. Það eykur einnig óvissuna að hlutfall af veiddu magni og útfluttu magni, sem myndar grunn fyrir útflutningsverðmæti, hefur verið breytilegt yfir tíma. Það hlutfall markast að miklu leyti af því hversu mikið er fryst og hversu mikið fer í lýsi og mjöl.“

Landsbankinn bendir á að mjög sterkt neikvætt samband hafi verið á milli annars vegar heildarafla og hlutfalls hrognatöku. „Það helgast fyrst og fremst af því að þegar kvótinn hefur verið lítill hafa útgerðarfyrirtæki beðið með að veiða loðnuna alveg fram að hrygningu til að tryggja hámarksmagn af hrognum. Þegar kvótinn hefur verið mikill hafa fyrirtækin einfaldlega þurft að veiða af kappi alla vertíðina til að ná að veiða sem mest áður en loðnan drepst. Þetta hefur þó breyst á síðustu árum með betri búnaði og eru fyrirtækin farin að geta stýrt því betur hvenær þau veiða loðnu m.t.t. þess að hámarka aflaverðmæti,“ segir í greiningu bankans.