Hafa gert stjórnvöldum tilboð um afhendingu krónueigna

Slitastjórnir bæði Glitnis og Kaupþings banka hafa gert stjórnvöldum tilboð sem miða að því að losa um krónueignir þessara slitabúa og ljúka uppgjöri þeirra með nauðasamningum. Gangi tilboð Kaupþings eftir mun ríkissjóður eignast Arion banka að fullu.

Tilboðin um afhendingu krónueignanna eru miklu þægilegri lausn fyrir slitabúin en ef þau yrðu skattlögð með sérstökum útgönguskatti sem gæti kostað þau hundruð milljarða króna eða jafnvirði þess. Bjarni Bendiktsson fjármálaráðherra sagði í viðtali í beinni í Íslandi í dag á mánudag að útgönguskattur væri eitthvað sem stjórnvöld væru að „skoða mjög alvarlega.“ Bjarni sagði að unnið væri að þessu máli á „hverjum einasta degi.“



Slitastjórn Kaupþings banka hefur boðið Eignasafni Seðlabanka Íslands, ESÍ, að eignast 87 prósenta hlut slitabús Kaupþings í Arion banka í skiptum fyrir annars vegar samþykktar kröfur ESÍ á hendur bankanum, en markaðsvirði þeirra nemur 35 milljörðum króna og hins vegar víkjandi láni í erlendum gjaldeyri sem ríkissjóður veitti Arion banka við endurreisn hans árið 2010 en lánið stendur í 31 milljarði króna. Frá þessu var fyrst greint í DV. Með þessu myndi slitabú Kaupþings eignast þetta víkjandi lán og sem eigandi þess ætti slitabúið kröfu í erlendum gjaldeyri á hendur Arion banka.

Þessi tillaga mun hafa verið reifuð fyrst á fundi með framkvæmdastjórn um afnám hafta hinn 9. desember. Samkvæmt upplýsingum Stöðvar 2 voru fleiri eignir nefndar í umræddum skiptum en ekki hefur fengist upp gefið hvaða eignir þetta eru. Það er ljóst að ef einungis er um að ræða víkjandi lán og kröfur ESÍ á hendur slitabúinu endurspeglar endurgjaldið engan veginn verðmæti eignarhlutarins í Arion banka. Eignarhlutur Kaupþings í Kaupskilum ehf., sem heldur á 87 prósenta hlutnum í Arion banka, var verðlagður á tæplega 150 milljarða króna í árshlutauppgjöri slitabús Kaupþings frá 30. júní í fyrra.

Samkvæmt upplýsingum fréttastofu lítur slitastjórn Kaupþings svo á að með því að afhenda ríkissjóði hlutinn í Arion banka í skiptum fyrir aðrar eignir sé verið að búa svo um hnútana að hægt sé að ljúka nauðasamningi Kaupþings, með tilheyrandi útgreiðslu á gjaldeyri til kröfuhafa, án þess að það ógni fjármálastöðugleika á Íslandi því þá sé engum krónueignum til að dreifa í eignasamsetningu búsins. 

Ríkissjóður færi með hundrað prósent hlut í Arion banka

Gangi þessi áform eftir verður ríkissjóður eigandi 100 prósent hlutafjár í Arion banka en íslenska ríkið fer í dag með 13 prósenta hlut í bankanum. Hjá Seðlabankanum fengust þau svör að ekkert formlegt tilboð hefði borist frá Kaupþingi. Þessi tillaga slitastjórnar Kaupþings hefur ekki komið inn á borð fjármálaráðuneytisins en litið er á tillöguna sem innlegg í hugsanlegar samningaviðræður við stjórnvöld.

Jóhannes Rúnar Jóhannsson hjá slitastjórn Kaupþings sagðist í samtali við fréttastofu ekki geta rætt um það sem fram fór á fundinum 9. desember. Það væri trúnaðarmál. 

Það eru svipaðir hlutir í farvatninu hjá öðru stóru slitabúi. Í nóvember 2013 lagði slitastjórn Glitnis banka fram tillögu til Seðlabankans sem sneri að krónueignum Glitnis. Tillagan var þess eðlis að hægt væri að ljúka nauðasamningum Glitnis án þess að þeir sköpuðu þrýsting á íslenska hagkerfið, þ.e. hefðu ekki neikvæð áhrif á greiðslujöfnuð Íslands. 

Í lok þriðja ársfjórðungs síðasta árs námu krónueignir slitabús Glitnis banka alls 318 milljörðum króna samkvæmt árshlutauppgjöri bankans fyrir fjórðunginn frá 18. nóvember. Þar af eru 167,5 milljarðar króna í formi 95 prósenta hlutar slitabúsins í Íslandsbanka.

Samkvæmt heimildum fréttastofu snýr tillaga Glitnis, sem send var Seðlabankanum í nóvember 2013 og uppfærð á árinu 2014, ekki að eignarhlutnum í Íslandsbanka heldur að öðrum krónueignum slitabús Glitnis. Það hefur verið stefna slitastjórnar að selja hlutinn í Íslandsbanka fyrir gjaldeyri. Eftir því sem fréttastofa kemst næst lýtur tillagan að því að ríkissjóður fái stóran hluta lausra krónueigna bankans í skiptum fyrir undanþágu frá gjaldeyrishöftum. 

Engin svör hafa borist frá Seðlabankanum vegna tillögunnar en bankinn hefur óskað eftir viðbótarupplýsingum vegna hennar. 

Vilja ekki borga útgönguskatt

Í báðum tilvikum er um að ræða tilboð slitastjórnanna sem miða því að ljúka uppgjöri slitabúanna. Slitastjórnirnar vilja frekar ganga til samninga við stjórnvöld og afhenda krónueignir en að eiga á hættu á að þurfa að greiða 20-35 prósenta útgönguskatt á allar eignir sínar, eins og nefnt var framar, en tillögur í þá veru hafa verið lagðar fram af framkvæmdastjórn um afnám hafta undir forystu Bandaríkjamannsins Glenn Victor Kim.

Heildartekjur ríkissjóðs af slíkum útgönguskatti gætu numið allt að 500 milljörðum króna, sé miðað við 20 prósenta skatt. Að þessu virtu væri mun „ódýrara“ fyrir slitabú bankanna að afhenda krónueignir sínar.