Kristján Freyr til H:N Markaðssamskipta

Kristján Freyr Halldórsson hefur verið ráðinn sem texta- og hugmyndasmiður hjá auglýsingastofunni H:N Markaðssamskiptum. Kristján Freyr starfaði um árabil sem verslunarstjóri hjá Máli og menningu á Laugavegi.

Kristján Freyr er meðal annars þekktur fyrir trommuleik sinn með hinum ýmsum hljómsveitum, þar á meðal með Prins Póló, Reykjavík!, Dr. Gunna og Geirfuglunum.

Hann er uppalinn Hnífsdælingur, með stúdentspróf frá Menntaskólanum á Ísafirði og nam íslensku og ensku frá Háskóla Íslands. Hann hefur komið víða við á ferli sínum situr meðal annars í framkvæmdastjórn Aldrei fór ég suður – rokkhátíðar alþýðunnar og sat í framkvæmdastjórn Miðborgarinnar okkar.

Kristján Freyr er dagskrárgerðarmaður hjá Ríkisútvarpinu og var um tíma framkvæmdastjóri Kimi Records. Þá sat hann í bæjarstjórn Ísafjarðar 1996-1998 fyrir hönd Funklistans.

Kristján Freyr er giftur Bryndísi Stefánsdóttur kennara og eiga þau tvö börn.

„Kristján Freyr hefur afar víðtæka reynslu sem á eftir að nýtast okkur og viðskiptavinum okkar vel,“ segir Ingvi Jökull Logason, framkvæmdastjóri H:N Markaðssamskipta.

„Hann hefur þess utan skipað stóran sess í miðbænum síðustu ár og við vildum alls ekki missa hann héðan. Við getum líka alltaf á okkur trommurum bætt.“

H:N Markaðssamskipti eru ein elsta auglýsingastofa landsins og fagnar 25 ára afmæli sínu í ár.