Andri Freyr rauk út úr stúdíóinu og skellti á eftir sér

Þeim Andra Frey Viðarssyni og Guðrúnu Sóley Gestsdóttir, dagskrárgerðarmönnum á Rás 2, lenti harkalega saman í beinni útsendingu í gær.

Fastur liður í morgunþætti Rásar 2 er sá að Andri Freyr komi undir lok þáttar og kynni það sem er í Virkum morgnum, þætti hans sem tekur við. Útvarpshlustendum brá nokkuð í brún, enda ekki vanir átökum af þessu tagi í sjálfu ríkisútvarpinu en afar grunnt virtist á því góða milli hans og svo Guðrúnar Sóleyjar Gestsdóttur sem hafði umsjá með morgunþættinum ásamt Jóni Þór Helgasyni. Þeim samskiptum lauk með því að Andri Freyr rauk út úr útsendingu í fússi.

Rígurinn snerist um tónlistarsmekk og svo lífsstílsblogg Andra Freys, en hann furðaði sig á því að Guðrúnu Sóley þætti það svona fyndið. Þegar svo kom að því að ræða hvað væri á dagskrá hjá Andra Frey, spurði Guðrún Sóley hvort ætti að breyta eitthvað til, hafa eitthvað skemmtilegt, tók Andri Freyr því óstinnt upp: „Þú ert svo leiðinleg að ég nenni ekki að koma hérna lengur.“

Og við svo búið rauk hann út eftir skammvinnar orðahnippingar.

Samkvæmt heimildum Vísis var haldinn hálfgildings neyðarfundur um samstarfsörðugleika milli dagskrárgerðarmanna á Rás 2 en Guðrún Sóley vísar því alfarið á bug, í samtali við Vísi.

„Neinei, þetta var svo agnarsmátt að engin ástæða var til að funda um þetta,“ segir Guðrún Sóley og segir þetta storm í vatnsglasi. „Þetta var allt á ljúfu nótunum.“

En, það getur nú fokið í Austfirðinginn?

„Já er það? Nei, hann Andri er svo ljúfur,“ segir Guðrún Sóley og vill meina að þeirra samskipti hafi verið í hinu mesta gríni, í tilefni af Degi íslenskrar tungu. Hún segir að þetta hafi verið til þess eins fallið að skerpa á kærleikanum þeirra á milli.

Hér má hlusta á umrædda rimmuna sem er undir lok þáttar, 1:28:00, og ef þetta er grín verður að segjast að þau Guðrún Sóley og Andri Freyr sýna þarna leikhæfileika svo af ber.