Félag Baltasars dæmt til að greiða milljónir vegna deilna um vinnu við Djúpið

Andakt ehf., framleiðslufélag í eigu leikstjórans Baltasars Kormáks, hefur tapað dómsmáli vegna leigu á krönum við tökur á Djúpinu árið 2010. Andakt var dæmt í Héraðsdómi Reykjavíkur síðastliðinn föstudag til að greiða Á.B. Lyftingu ehf. ríflega fjórar milljónir króna auk dráttarvaxta auk þess að greiða 700 þúsund krónur í málskostnað.

Deilurnar snérust um leigu á krönum sem notaðir voru á tökustað í höfninni í Helguvík á Reykjanesi við tökur á Djúpinu haustið 2010. Tveir kranar, einn 200 tonna og annar 300 tonna, voru við störf á tökustað frá 1. til 9. september að undanskilinni helginni 4. til 5. september.

Kranarnir voru látnir rugga bát sem var í höfninni og hvolfa honum sem að lokum sökk. Í kjölfarið þurfti að hífa bátinn úr höfninni.

Deilt um laun, skatta og akstur

Á.B. Lyfting sendi Andakt reikning upp á 8,16 milljónir króna þann 13. september 2010. Þessu mótmælti Andakt og taldi að ofrukkað hefði verið fyrir vinnuna þar sem þær upplýsingar hefðu fengist að að leiga á krönunum væri 200.000 krónur á dag fyrir minni kranann og 300.000 krónur fyrir þann stærri.

Gert hafi verið ráð fyrir að í þeirri tölu hafi verið innifalið akstur til og frá tökustað, laun kranamanna og bílstjóra sem og virðisaukaskattur. Enginn skriflegur samningur lá fyrir í málinu.

Í kjölfarið greiddi félag Baltasars Á.B. Lyftingu 3,5 milljónir króna. Þetta sætti Á.B. Lyfting sig ekki við og höfðaði að lokum dómsmál vegna deilunnar sem nú hefur verið dæmt í. Á.B. Lyfting taldi að verkið hafi orðið mun viðameira en í upphafi hafi staðið til þar sem ekki hafi verið gert ráð fyrir að hífa þyrfti bátinn upp úr höfninni.

Dómari féllst á kröfu Á.B. Lyftingar að því undanskyldu að hann taldi að ofrukkað hefði verið fyrir akstur. Því þarf félag Baltasars, eins og áður sagði, að greiða ríflega fjórar milljónir króna auk dráttarvaxta og 700 þúsund króna málsvarnarlauna.



Lesa má dóm Héraðsdóms í heild sinni hér.