Ferðast um heiminn með golfkylfur í för

„Ég er ótrúlega spennt að takast á við þetta,“ segir Guðný Helga Herbertsdóttir, sem hefur verið ráðin deildarstjóri samskiptadeildar Landspítalans. Hún mun hefja störf um miðjan maí. Guðný Helga er upplýsingafulltrúi Íslandsbanka en þar áður var hún fréttamaður á Stöð 2.

„Þetta er þjóðarsjúkrahúsið okkar og skiptir okkur því öll máli,“ segir Guðný Helga þegar hún er spurð að því hvort hún hafi mikinn áhuga á heilbrigðismálum. „Maður hefur auðvitað fylgst vel með því sem er að gerast þar. Ég sá það þó betur í þessu umsóknarferli hvað það eru ótrúlega flottir hlutir unnir þarna,“ segir Guðný Helga. Hún bendir á að Landspítalinn gegni að auki mikilvægu hlutverki sem mennta- og vísindastofnun og þar sé gerður mikill fjöldi rannsókna sem eru birtar í erlendum vísindaritum en Íslendingar heyri ekki mikið um. „Það er einn þáttur sem ég vil breyta,“ segir hún.

Guðný Helga útskrifaðist úr Verzlunarskóla Íslands árið 1998 og hóf svo nám í viðskiptafræði við Háskóla Íslands. Þaðan lá leið hennar til Árósa í Danmörku og hún tók meistarapróf þar við Viðskiptaháskólann í Árósum. Guðný Helga hefur tvisvar búið í Danmörku og samtals í um það bil þrjú og hálft ár. Hún segist vel geta gert sig skiljanlega á dönsku. „Ég myndi kannski ekki fara að skrifa bók á dönsku en ég get alveg átt samskipti auðveldlega á dönsku,“ segir hún.

Guðný Helga og Pétur Rúnar Pétursson, sambýlismaður hennar, reka stórt heimili. Þau eiga saman dótturina Emmu Katrínu sem er eins og hálfs árs. Guðný Helga segir að litla stelpan sé í miklu uppáhaldi hjá allri fjölskyldunni og að bræður hennar stjani við hana. Guðný Helga á líka soninn Ása Goða, sem er að verða þrettán ára, og stjúpsynina Jón Alex Pétursson, sem er að verða sextán ára, og Óskar Pétursson, sem er að verða sjö ára.

Fjölskyldan fer saman á skíði í frítíma sínum. „Svo spila ég golf á sumrin. Mér finnst það alveg ótrúlega skemmtilegt þótt ég sé mjög léleg í því og lítið um náttúrulega hæfileika á þessu sviði. Þetta er líka svo góð samvera með fjölskyldunni minni. Við spilum mikið með foreldrum mínum og ég hef verið í golfhópi með frænkum mínum,“ segir hún.

Guðnýju Helgu finnst líka gaman að elda mat og halda matarboð. „Við gerum svolítið af því,“ segir ún og segist jafnframt reyna að prófa sífellt nýjar uppskriftir. Guðný Helga og Pétur Rúnar reyna líka að nota hvert tækifæri til að ferðast og þá eru golfkylfurnar oft með í för.