Afkoma þriggja stærstu sveitarfélaga versnar

Afkoma stærstu sveitarfélaga landsins, það er Reykjavikurborgar, Hafnafjarðar og Kópavogs, virðist nú fara versnandi. Greiningadeild Arion banka bendir á að uppgjör síðasta árs og nýlegar tölur um afkomu þriggja stærstu sveitarfélaga landsins beri þess glöggt vitni.

Greiningadeild bendir á að í þessum uppgjörum hafi versnandi afkoma komið skýrt í ljós, gjöld hafi vaxið umfram tekjur og rekstrarniðurstaða verið lakari en á sama tímabili í fyrra og jafnvel lakari en fjárhagsáætlanir gerðu ráð fyrir.

Greiningadeild bendir á að launakostnaður vegi þyngst í auknum útgjöldum. Í tilviki Kópavogsbæjar hafi launakostnaður til að mynda aukist um rúm 14% á fyrri hluta ársins samanborið við sama tímabil 2014 á meðan tekjur sveitarfélagsins jukust um 5%.

Laun og launatengd gjöld eru um helmingur af heildarrekstrarkostnaði sveitarfélaga á Íslandi. Greiningadeild segir að versnandi afkoma komi alls ekki á óvart og sé í raun framhald af þróun síðastliðins árs þar sem veruleg sveifla hafi orðið til hins verra í afkomu íslenskra sveitarfélaga eftir mikinn rekstrarbata árin þar á undan.