Byko kærir ákvörðun Samkeppniseftirlitsins

Byko hefur ákveðið að kæra ákvörðun Samkeppniseftirlitsins til áfrýjunarnefndar Samkeppnismála. Samkeppniseftirlitið birti í morgun ákvörðun þar sem 650 milljóna króna sekt er lögð á fyrirtækið vegna ólöglegs samráðs við Húsamiðjuna.

Byko sakar stofnunina um áróður með uppsetningu á upplýsingasíðu sem sett hefur verið upp vegna málsins.

Sjá einnig: Byko sektað um 650 milljónir vegna ólögmæts samráðs

Þá segir Byko að niðurstaðan sé í beinni andstöðu við nýfallinn dóm fjölskipaðs Héraðsdóms Reykjaness þar sem 11 af 12 sakborningum voru sýknaðir í sakamáli sem var höfðað vegna málsins.

Eins og fram kemur í tilkynningu Samkeppniseftirlitsins vegna ákvörðunar stofnunarinnar hefur sakamálinu sem höfað var fyrir héraðsdómi verið áfrýjað til Hæstaréttar.