Jumanji fagnar tuttugu ára afmæli

Það muna sjálfsagt margir eftir hinni æsispennandi atburðarás sem fór af stað þegar systkinin Judy og Peter grípa í gamalt borðspil sem þau finna uppi á háalofti í nýjum híbýlum sínum.

Atburðarásin á sér að sjálfsögðu stað í kvikmyndinni Jumanji sem frumsýnd var fyrir tuttugu árum og á enn þann dag í dag stað í hjarta fjölmargra áhorfenda.

Myndin skartar leikaranum Robin Williams í einu af aðalhlutverkjunum, en Williams lést í ágúst árið 2014, auk þess sem leikkonan Kirsten Dunst fer með hlutverk Judy.

Handritið að myndinni er skrifað upp úr samnefndri barnabók eftir Chris Van Allsburg sem kom út árið 1981.

Í upphafi myndarinnar sjást tveir ungir drengir grafa borðspilið og frá því berst dynjandi trommusláttur. Öld síðar finnur drengur að nafni Alan Parrish Jumanji og spilar það við vinkonu sína. Fljótlega verður þó ljóst að hér er ekki um einfalt Monopoly að ræða og kristalskúla á miðju borðinu sendir dullarfull skilaboð eftir hvert kast og eftir að hafa setið við spilið í stutta stund ásamt vinkonu sinni sogast Alan inn í spilið og kristalskúlan segir að hann muni dvelja á einangruðum stað þar til einhver fær upp fimm eða átta á teningnum.

Rúmum þrjátíu árum síðar finna svo systkinin Judy og Peter spilið og fljótlega verður allt vitlaust. Óðir apakettir æða um allt og þegar Peter kastar teningnum og fær upp fimm kemur fullvaxta ljón og Alan sjálfur birtist fúlskeggjaður og fullorðinn úr spilinu eftir áralanga útlegð. Þríeykið áttar sig á því að þau þurfi að klára spilið til þess að martröðin endi og þau þurfa að fá vinkonu Alans, sem spilaði spilið með honum þegar hann sogaðist inn í það, til þess að taka þátt og hjálpa þeim að ljúka verkinu.

Myndin hlaut góðar viðtökur og var jafnvel ráðist í gerð sjónvarpsseríu og í fyrra seldist spilið sjálft, sem var leikmunur í myndinni á eBay, fyrir 60.800 bandaríkja dali.

Í ágúst síðastliðnum tilkynnti Sony Pictures Entertainment að fyrirtækið hygðist endurgera myndina og stefnt væri að því að hún kæmi út þann 25. desember árið 2016. Tryggir aðdáendur myndarinnar brugðust ókvæða við og vöktu tíðindin ekki mikla lukku og gagnrýndi Bradley Pierce, sem fór með hlutverk Peters, áformin.