Sem hnefahögg í andlit aldraðra og öryrkja

„Ríkisstjórnin hefur hækkað svo mikið komugjöld í heilbrigðiskerfinu og dregið svo mjög úr niðurgreiðslum á nauðsynlegum hjálpartækjum aldraðra, að þær takmörkuðu kjarabætur, sem aldraðir og öryrkjar fengu um sl. áramót hafa verið teknar til baka,“ segir í ályktun kjaranefndar Félags eldri borgara.

Í ályktuninni segir að stórlega hafi verið dregið úr niðurgreiðslum á öryggishnöppum með þeim afleiðingum að leiga fyrir afnot af þessum nauðsynlegu öryggistækjum eldri borgara hefur hækkað um 89%.  Allar þessar hækkanir séu sem hnefahögg í andlit aldraðra og öryrkja.

„Kjaranefnd Félags eldri borgara í Reykjavík ítrekar áskorun sína  á heilbrigðisráðherra um að afturkalla hækkanir á komugjöldum í heilbrigðisþjónustu, sem tóku gildi um síðustu áramót svo og áskorun á ráðherra um að  afturkalla hækkanir á ýmsum stoðtækjum og hjálpartækjum, sem nauðsynleg eru fyrir aldraða  til þess að geta dvalist í heimahúsum í stað þess að fara á hjúkrunarheimili.

Komugjöld á heilsugæslustöðum hækkuðu um 20%  um sl . áramót og komugjöld til sérfræðinga hækkuðu um 19%. Dregið var svo mikið úr niðurgreiðslum á stoðtækjum og hjálpartækjum, að verð á þeim hefur stórhækkað.

Sjúklingar, sem þurfa á bleium að halda, þurfa nú að greiða 4-5000 kr. á mánuði fyrir þær en áður  voru þær ókeypis.  Kostnaður sjúklings af hjálpartæki vegna kæfisvefns hefur verið hækkaður um 77%.

Kjaranefnd skorar á heilbrigðisráðherra að draga til baka lækkun á niðurgreiðslu á öryggishnöppum.“