Neytendastofa sektar sjö verslanir um 6 milljónir

Neytendastofa hefur sektað sjö rekstraraðila matvöruverslana um rúmlega 6 milljónir fyrir að fara ekki að fyrirmælum stofnunarinnar um að bæta verðmerkingar. Þetta kemur fram í frétt á vef Neytendastofu.

Í verðmerkingareftirliti Neytendastofu í matvöruverslunum er kannað hvort vörur séu verðmerktar bæði með söluverði og með einingarverði auk þess sem farið er yfir hvort verð á hillu sé rétt. Þá er skoðað sérstaklega hvernig verðmerkingum með notkun verðskanna er háttað. 

Neytendastofa gerði athugasemdir við verðmerkingar í flestum þeirra matvöruverslana sem voru skoðaðar, en þegar skoðuninni var fylgt eftir höfðu 19 verslanir, í eigu sjö fyrirtækja, ekki enn gert fullnægjandi umbætur á verðmerkingum. Athugasemdir voru gerðar í flestum verslunum við fjölda ómerktra eða vitlaust verðmerktra vara, en einnig voru athugasemdir gerðar við að einingaverð vantaði í nokkrum verslunum. 

Neytendastofa hefur því gripið til þess að leggja stjórnvaldssekt á fyrirtækin 10-11, Bónus, Iceland, Krónan, Nettó, Plúsmarkaðurinn, Samkaup og Vietnam Market.