Hafa selt 772 fasteignir það sem af er ári

Íbúðalánasjóður (ÍLS) hefur selt 772 eignir það sem af er ári. Mun hraðar gengur að losa um fasteignir Íbúðalánasjóðs nú en áður, segir í tilkynningu. Af eignunum voru 472 sölur á einstökum eignum. Sala á 114 íbúðum til viðbótar er langt komin. Sem dæmi um hraðann í sölu eigna þá voru 18 kauptilboð samþykkt í fasteignir í eigu Íbúðalánasjóðs í gær.

Langflestar sölurnar á stökum íbúðum og húsum fara í gegnum fasteignasölur. Um er að ræða 472 slíkar stakar sölur til nýrra eigenda á þessu ári. 300 eignir hafa verið seldar fleiri saman í pakka það sem af er ári, yfirleitt til leigufélaga en mikil eftirspurn er nú á markaðnum eftir leiguíbúðum.

1400 eignir nú í eigu ÍLS

Vel gengur að losa um eignir sjóðsins í sveitarfélögum á Reykjanesi og virðist fasteignamarkaðurinn þar hafa tekið við sér eftir nokkur afar erfið ár. Sjóðurinn hefur fengið gagnrýni fyrir að selja ekki nógu hratt þær fasteignir sem hann hefur eignast en aukin eftirspurn og markvissar aðgerðir til að losa um eignir sjóðsins hafa breytt þeirri mynd allnokkuð. Ef fram heldur sem horfir verða mun færri fasteignir eftir í eigu sjóðsins í lok næsta árs. Ríflega 1.400 eignir eru nú í eignasafni sjóðsins en þær voru 2.600 þegar mest var.