Kolbeinn ráðinn fjármálastjóri Hölds

Kolbeinn Friðriksson hefur verið ráðinn fjármálastjóri hjá Höldi ehf – Bílaleigu Akureyrar. Hann mun taka til starfa á næstu mánuðum.

Undanfarin tvö ár hefur Kolbeinn starfað sem framkvæmdastjóri fjármálasviðs hjá Eik fasteignafélagi hf, þar áður hjá Íslandsbanka og Bakkavör.

Í tilkynningu kemur fram að Kolbeinn segist hlakka til að takast á við spennandi og krefjandi starf hjá mjög öflugu og ört stækkandi fyrirtæki á Akureyri. „Jafnframt hlökkum við fjölskyldan til að flytjast búferlum í heimahagana til Akureyrar. Undanfarin ár hafa verið mjög lærdómsrík hjá Eik fasteignafélagi og mun sú jákvæða reynsla nýtast mér mjög vel í komandi verkefnum“.

Steingrímur Birgisson forstjóri Hölds segir það mikið gleðiefni að fá Kolbein til liðs við fyrirtækið. „Ég tel að Kolbeinn muni falla einstaklega vel inn í okkar öfluga hóp starfsmanna. Kolbeinn býr yfir mikilli reynslu sem mun nýtast fyrirtækinu vel og mun hann leika lykilhlutverk í að gera gott fyrirtæki enn betra.“

Kolbeinn lauk M.Sc. gráðu í fjármálum frá Berlin School of Economics and Law árið 2011, B.Sc. gráðu í viðskiptafræði frá Háskólanum í Reykjavík árið 2005 og stúdentsprófi frá Verkmenntaskólanum á Akureyri árið 2001. Auk þess er hann með próf í verðbréfaviðskiptum.

Höldur var stofnað árið 1974 og eru starfsmenn á bilinu 220 til 270 eftir árstíma.