Starfsmenn fá frí til að fagna afmæli kosningaréttar kvenna

Landsbankinn hefur ákveðið að veita starfsfólki sínu frí eftir hádegið þann 19. júní til að taka þátt í skipulögðum hátíðahöldum þegar þess verður minnst að 100 ár eru liðin frá því að konur fengu kosningarétt. Þetta kemur fram í tilkynningu frá bankanum.

Öll útibú bankans verða lokuð og önnur starfsemi í lágmarki. Í tilkynningunni segir að með þessu vilji bankinn sýna í verki stuðning sinn við jafnrétti.

„Landsbankinn hefur skýra jafnréttisstefnu og frá árinu 2010 hefur bankinn haft þá stefnu að hlutur hvors kyns í forystusveit bankans sé ekki undir 40%. Í framkvæmdastjórn bankans sitja nú 4 konur og 4 karlar og bankaráð Landsbankans uppfyllir kröfur um jafnan hlut kynja í stjórnum. Í Landsbankanum eru nú 61% starfsmanna konur og 39% karlar,“ segir í tilkynningunni.

Þar kemur einnig fram að Landsbankinn leitist við að skapa framúrskarandi vinnustað þar sem allir eiga sömu möguleika til starfa og starfsþróunar og þar sem konur og karlar eigi jafna möguleika til stjórnarsetu. Bankinn forðast að skilgreina störf sem karla- eða kvennastörf.

„Landsbankinn greiðir sömu laun fyrir sambærileg störf og nýverið fékk bankinn gullmerki Jafnlaunaúttektar PwC.  Landsbankinn er fyrstur banka á Íslandi til að hljóta gullmerkið og er jafnframt stærsta fyrirtækið sem hefur undirgengist og staðist þá úttekt.“