Nefnd gegn hækkun verðlags

Forsætisráðherra skipaði í gær fastanefnd um samskipti ríkisins, sveitarfélaga og heildarsamtaka aðila á vinnumarkaði til að hafa yfirsýn yfir regluleg samskipti og vera vettvangur skoðanaskipta um sameiginleg hagsmunamál. Þá mun nefndin skipuleggja aðgerðir til að fylgjast með og vinna gegn hækkun verðlags.

Þetta var gert á fundi ríkisstjórnarinnar þar sem Bjarni Benediktsson fjármálaráðherra lagði fram frumvarp um gjaldalækkanir ríkissjóðs í samræmi við fjárlög en gjaldtakan mun lækka um 460 milljónir króna. Með því vill ríkisstjórnin styðja við viðleitni kjarasamningsaðila til að rjúfa vítahring verðbólgunnar.

„Nefndin mun fara yfir verðlagsmál og með hvaða hætti væri hægt að draga úr verðhækkunum, til dæmis með að beita fortölum, til að þessir styttri kjarasamningar heppnist, það verði raunaukning á kaupmætti á grunni þeirra og jarðvegurinn undirbúinn fyrir lengri kjarasamninga í haust,“ segir Benedikt Árnason, nýskipaður formaður fastanefndarinnar.

Þá hefur forsætisráðherra beint því til nefndarinnar að skipuleggja aðgerðir til að vinna gegn hækkun verðlags og skoða leiðir til að sporna gegn sjálfvirkri vísitöluhækkun ýmissa samninga á markaði, svo sem þjónustusamninga fyrirtækja, leigusamninga og verksamninga.