Dúkkulísuvefur mokar inn milljónum

Hagnaður af rekstri dúkkulísuvefsins dressupgames.com nam tæpum 48 milljónum króna á síðasta ári samkvæmt nýbirtum ársreikningi.

Félagið er alfarið í eigu Ingu Maríu Guðmundsdóttur bókasafnfræðings á Ísafirði. Það var stofnað 2007 en síðan var opnuð árið 1998. Á henni má finna tengla inn á fjölmarga tölvuleiki þar sem dúkkulísur af öllum stærðum og gerðum eru klæddar í föt og skreyttar með ýmsum fylgihlutum. Vefsíðan fær milljónir innlita í hverjum mánuði en tekjurnar koma inn í gegnum auglýsingasamning við Google.

Eigið fé félagsins nam 194 milljónum króna í árslok 2013. Eignirnar námu þá rúmum 208 milljónum og skuldirnar tæpum 15 milljónum. Rekstur Dress up games hefur skilað hagnaði frá því félagið var stofnað og það hefur á undanförnum árum verið á meðal arðbærustu fyrirtækja á Vestfjörðum. Afkoman hefur þó aldrei verið betri en árið 2010 þegar hún var jákvæð um 111 milljónir króna.

Í ársreikningi félagsins kemur fram að arðgreiðslur hafi numið 40 milljónum króna í fyrra og 38 milljónum árið 2012.

Inga María Guðmundsdóttir vildi ekki tjá sig um rekstur vefsins þegar fréttastofa leitaði eftir því.