Segir arðgreiðslur bankanna eðlilegar

„Þetta hefur verið gert af skynsemi,“ segir Unnur Gunnarsdóttir, forstjóri Fjármálaeftirlitsins, um arðgreiðslur viðskiptabankanna þriggja sem nema þriðjungi af samanlögðum hagnaði þeirra árið 2013.

„Það eru engin hættumerki núna enda eru bankarnir með mjög sterka eiginfjárstöðu og eins og sakir standa hafa þeir ekki stofnað þeirri stöðu í neina hættu með þessum arðgreiðslum,“ segir Unnur.

Már Guðmundsson seðlabankastjóri segir í nýju riti Seðlabankans um fjármálastöðugleika að enn sé tilefni til að stilla arðgreiðslum bankanna í hóf. Staða bankanna sé ekki eins góð og virðist við fyrstu sýn. Ein ástæðan sé sú að erlend lausafjárstaða þeirra muni að óbreyttu versna verulega komi ekki til skilmálabreytinga á skuld nýja Landsbankans við þann gamla eða eðlilegur aðgangur nýja bankans að erlendu lánsfé hafi opnast áður. Hluti góðrar afkomu bankanna byggist á virðishækkun útlána og fleiri óreglulegum þáttum og hærri bankaskattar muni rýra afkomu bankanna.

„Við höfum tekið undir að það þarf að fara varlega í þessar arðgreiðslur en það er einnig heilbrigðismerki að geta greitt út arð til eigenda sinna,“ segir Unnur.

Stóru viðskiptabankarnir þrír, Landsbankinn, Arion Banki og Íslandsbanki, hafa samtals greitt 31,8 milljarða króna í arð til hluthafa á þessu ári. Stór hluti þeirrar upphæðar rennur í ríkissjóð en ríkið á meðal annars 97,7 prósenta eignarhlut í Landsbankanum.

Guðjón Rúnarsson, framkvæmdastjóri Samtaka fjármálafyrirtækja (SFF), telur bankana hafa stigið varlega til jarðar þegar kemur að arðgreiðslum.

„Sjónarmið seðlabankastjóra eru fullrar athygli verð. Eins og hann nefnir eru tímabundnir þættir eins og endurmat eigna sem hafa haft jákvæð áhrif á afkomu bankanna en þau áhrif eru ekki viðvarandi,“ segir Guðjón og bendir á að fyrir Alþingi liggi frumvarp þar sem eiginfjárkröfur til fjármálafyrirtækja eru hertar.

„Ég held að þessar arðgreiðslur séu klárlega mjög hófstilltar enda mikið eigið fé bundið í þessum fyrirtækjum og verulegur meirihluti af þessari tölu fer í vasa ríkisins,“ segir Guðjón.