Nýjar reglur um gjaldeyrishöft vekja furðu

Tryggingafélagið Allianz segir í yfirlýsingu að það hafi í einu og öllu unnið í samráði við og með leyfi Seðlabanka Íslands allt frá því lög um gjaldeyrishöft voru sett.

Í gær var tilkynnt um að bankinn hyggist setja nýjar reglur sem feli í sér að greiðslur iðgjalda til erlendra tryggingafélaga verði ekki lengur heimilar. Þá segir að Seðlabankinn hafi ekki sett sig í samband við né tilkynnt félaginu um þessar breytingar á reglum um gjaldeyrishöft og því komi það félaginu í opna skjöldu ef breyta eigi reglum eftir á. Allianz mun óska eftir fundi með Seðlabankanum og FME til að fara yfir þessa nýju túlkun á reglum um gjaldeyrishöft með hagsmuni viðskiptavina Allianz að leiðarljósi, segir að lokum.