Spá 3,1% hagvexti

Hagstofa Íslands gerir ráð fyrir að landsframleiðsla aukist um 3,1% á þessu ári og 3,4% á því næsta. Þetta kemur fram í Hagtíðindum sem komu út í dag. Hagvöxtur verður samkvæmt þessu töluverður þó að bráðabirgðatölur bendi til þess að nánast enginn hagvöxtur hafi verið á fyrsta fjórðungi og aflabrestur í loðnu. 

Gert er ráð fyrir að þjóðarútgjöld aukist um u.þ.b. 5% árlega á þessu ári og næsta sem endurspeglar vöxt einkaneyslu og fjárfestingar. Aukning einkaneyslu verður 3,9% í ár og fjárfesting eykst um 16,9%. Á næsta ári er reiknað með að einkaneysla aukist um 3,7% og nálægt 3% á ári 2016-2018. Fjárfesting eykst um 15,7% árið 2015 og vex áfram ef frá er talið árið 2017. Samneysla eykst um 1,2% árið 2014 og 0,5% 2015, en vex um tæp 2% á ári eftir það.

Hagstofan gerir ráð fyrir að áætlun ríkisstjórnarinnar um lækkun verðtryggðra íbúðalána ásamt aukningu ráðstöfunartekna, sem m.a. má rekja til styrkingar vinnumarkaðar, muni styðja við einkaneyslu á spátímanum.

Spáð er 2,5% verðbólgu á þessu ári, 3,4% á næsta ári, 3,2% árið 2016, en undir þremur prósentum eftir það. Stórum hluta kjarasamninga í ár er lokið en þeir eru flestir til skamms tíma. Óvissa um launa- og verðlagsþróun á næstu árum er því nokkur, að mati Hagstofunnar.

Hagstofan gaf síðast út þjóðhagsspá 11. apríl síðastliðinn og er næsta útgáfa ráðgerð í nóvember.