Íslenska hagkerfið hefur tekið miklum framförum

Íslensku bankarnir eru nú á meðal best fjármögnuðu banka í Evrópu og hefur íslenska hagkerfið tekið miklum framförum á síðustu árum. Þetta er meðal þess sem Håkon Reistad Fure, sérfræðingur hjá norska DNB bankanum og einn þekktasti greinandi á fjármálamarkaði í Noregi sagði á morgunfundi Norsk-íslenska viðskiptaráðsins á Hilton í dag.  Hann segir algjöran viðsnúning hafa átt sér stað og því séu horfurnar bjartar.

Håkon segir að með minnkandi atvinnuleysi á landinu og með batnandi skuldastöðu þjóðarbúsins hafi íslenska hagkerfið tekið miklum framförum eftir hrun bankanna haustið 2008. Þá segir hann íslenska bankakerfið í sterkri stöðu til að styðja við hagvöxt.

Árið 2011 var atvinnuleysi á Íslandi það mesta af öllum Norðurlöndunum, en nú er það breytt og er það lægra en víðast hvar í Evrópu.

Hann sagði gæði eigna bankanna mun betri en áður, og sagði svokölluðum vandræðalánum hafa fækkað verulega. Nú væru gæðin farin að verða svipuð og í Noregi og Svíþjóð.