Fyrsta Delta ferð sumarsins lenti í morgun

Sumaráætlun Delta Air Lines hófst í morgun þegar Boeing 757 þota félagsins lenti á Keflavíkurflugvelli en þetta kemur fram í fréttatilkynningu frá Delta.

Delta mun lenda daglega á Keflavíkurflugvelli í allt sumar, en þetta er í fyrsta skipti sem félagið býður upp á dagleg flug milli Íslands og New York.

Þetta er fjórða sumarið í röð sem Delta býður upp á flug milli Keflavíkurflugvallar og JFK flugvallar í New York. Um er að ræða verulega aukna ferðatíðni hjá Delta til að bregðast við vaxandi áhuga ferðamanna vestan hafs á Íslandi. Fyrstu fjóra mánuði þessa árs fjölgaði ferðamönnum frá áfangastöðum í Norður-Ameríku um 43% miðað við sama tíma í fyrra.

Þessi aukna ferðatíðni Delta skapar um leið góðan valkost til ferðalaga frá Íslandi, ekki aðeins til New York, heldur ekki síður með tengiflugi Delta til þeirra 50 áfangastaða í Bandaríkjunum og Suður-Ameríku sem félagið þjónar frá Kennedyflugvelli.