Hafa samið um smíði tveggja ísfisktogara í Kína

Vinnslustöðin í Vestmannaeyjum og Hraðfrystihúsið Gunnvör í Hnífsdal hafa samið um smíði tveggja ísfisktogara í Kína. Framkvæmdastjóri Vinnslustöðvarinnar segir líklegt að fleiri sjávarútvegsfyrirtæki fylgi í kjölfarið og fjárfesti í ísfiskstogara. Eigendur frystitogara lifi veiðigjöldin ekki af.

Skipin sem Vinnslustöðin og Hraðfrystihúsið-Gunnvör hafa samið um kaup á kosta um einn og hálfan milljarða króna fullbúin hvort um sig. Þetta kemur fram í Fiskifréttum. Skipin verða afhent á árinu 2016. Nýi ísfiskstogari Vinnslustöðvarinnar mun leysa af hinn 42 ára gamla togara Jón Vídalín VE sem er kominn til ára sinna.

Nýju ísfisktogararnir verða 50,7 metrar að lengd og 12,8 metra breið. Sigurgeir Kristgeirsson, framkvæmdastjóri Vinnslustöðvarinnar, segir að skipið muni líklega kosta um tvo milljarða fullbúið.

Hann gerir ráð fyrir að fleiri sjávarútvegsfyrirtæki feti svipaða leið og fjárfesti í ísfiskstogara. Frystitogarinn sé á útleið.

Hann segir stefnu íslensks sjávarútvegs mjög óljósa um þessar mundir og hefur stefnt ríkinu vegna veiðigjalda sem hann efast um að standist lög. Málið verður tekið fyrir á næstu vikum. Veiðigjöldin hafi haft veruleg áhrif á rekstrargrundvöll Vinnslustöðvarinnar.