EFLA stofnar dótturfélag í Svíþjóð

EFLA verkfræðistofa hefur stofnað dótturfélagið EFLU AB í Stokkhólmi. Félagið mun veita sérhæfða þjónustu við háspennulínur og önnur verkefni sem lúta að flutningi og dreifingu raforku. Þetta kemur fram í fréttatilkynningu frá fyrirtækinu.

Ingemar Karlsson hefur verið ráðinn framkvæmdastjóri EFLU AB en Ingimar býr yfir áratuga reynslu í verkefnum við raforkukerfi á sænska markaðinum. Á undanförnum árum hefur EFLA unnið frá Íslandi að verkefnum við orkuflutningskerfið í Svíþjóð en með stofnun EFLU AB er stefnt að því að skapa EFLU varanlega fótfestu á sænska markaðnum.

„Í ljósi mikillar eftirspurnar á sænska markaðnum og þeirrar reynslu sem við höfum byggt upp undanfarin ár í Noregi er  eðlilegt næsta skref að horfa til Svíþjóðar“ segir Jón Vilhjálmsson sviðsstjóri Orkusviðs EFLU á Íslandi.

EFLA hefur nú þegar undirritað fyrsta rammasamninginn í Stokkhólmi en hann er við Svenska Kraftnät og er til tveggja ára og framlengjanlegur um tvö ár. Samningurinn tryggir EFLU þátttöku í útboðum Svenska Kraftnät á sviði háspennulína, en áform eru um uppbyggingu sem nemur 400-500 km á ári af nýjum 400 kV loftlínum fram yfir árið 2025. Framkvæmdirnar eru liður í verulegri styrkingu flutningskerfis raforku í Svíþjóð sem hefur m.a. það hlutverk að miðla orku milli norður Skandinavíu og meginlands Evrópu.