Krónan ekki sterkari í tæpt ár

Gengi íslensku krónunnar hefur styrkst mikið á síðustu mánuðum og hefur gengisvísitalan ekki verið lægri í tæpt ár. Forstjórar tveggja af stærstu útgerðarfyrirtækjum landsins saka Seðlabankann um að falsa gengi krónunnar.

Gengisvísitala íslensku krónunnar hefur lækkað talsvert á fyrstu mánuðum ársins sem þýðir að gengi krónunnar styrkist. Gengisvísitala krónunnar farið úr rúmum 220 stigum í nóvember á síðasta ári og í tæp 207 stig miðað við gengi dagsins í dag.

Forstjórar HB Granda og Þorbjarnar HF, tveggja af stærstu sjávarútvegsfyrirtækjum landsins, segja í samtali við Bloomberg fréttastofuna að gengi íslensku krónunnar sé alltof sterkt og ekki í takt við raunveruleikann. Það komi sér illa fyrir sjávarútveginn og útflutningsgreinar.

Forsvarsmenn Seðlabankans gátu ekki veitt viðtal um málið í dag þegar eftir því var leitað vegna yfirvofandi peningastefnuákvörðunar.

Fjöldi ferðamanna styrkir krónuna

Ásdís Kristjánsdóttir, forstöðumaður efnahagssviðs Samtaka atvinnulífsins, segir mikla styrkingu krónunnar í upphafi árs koma á óvart.

„Það eru ýmsar skýringar á styrkingu krónunnar. Í fyrsta lagi höfum við séð aukinn straum erlendra ferðamanna koma til landsins og það hefur áhrif á gengi krónunar þar sem við fáum gjaldeyri til landsins. Það eru líka vísbendingar þess efnis að á sama tíma séu innlendir aðilar, sem þurfa að standa straum af erlendum afborgunum á þessu ári, að þeir séu ekki í eins miklum mæli að safna gjaldeyri,“ segir Ásdís í samtali við fréttastofu Stöðvar 2.

Ásdís leggur mikla áherslu á að Seðlabankinn beiti áhrifum sínum til að draga úr sveiflum gengisvísitölunnar og stuðli að stöðugleika.

„Seðlabankinn hefur frá því á síðasta ári verið að beita inngripum til að sveiflujafna gengi krónunnar. Ég myndi ætla að ef Seðlabankinn sér fram á að það sé verulegt innflæði að fara að eiga sér stað á komandi mánuðum þá muni bankinn beita sér gegn sveiflum á gengi krónunnar.“