Telja íslensk fyrirtæki vera of skuldsett

Meirihluti 300 stærstu fyrirtækja landsins stefnir á fjárfestingar á árinu 2014 eða 77 prósent fyrirtækja. Þetta er meðal þess sem fram kemur í fyrstu könnun ráðgjafasviðs Deloitte á meðal fjármálastjóra stærstu fyrirtækja á Íslandi. Tilgangur könnunarinnar er að sýna viðhorf fjármálastjóra til stöðu fyrirtækja og efnahagsumhverfisins og er ætlun Deloitte að framkvæma hana hálfsárslega.

Þrátt fyrir áætlanir um fjárfestingar á þessu ári sýna niðurstöður könnunarinnar að fjármálastjórar gera ekki ráð fyrir aukinni skuldsetningu en 50 prósent fyrirtækja áætla að skuldsetning verði óbreytt en 34 prósent þeirra áætla að draga úr skuldsetningu. Það samræmist áliti fjármálastjóra um að íslensk fyrirtæki séu of skuldsett.

Aðspurðir um hagkvæmni fjármögnunarleiða telur meirihluti fjármálastjóra að útgáfa hlutafjár og skuldabréfa sé hagkvæm en að lántaka hjá bönkum sé óhagkvæm. Framboð á lánsfé sé til staðar en það sé dýrt. Þó áætla fjármálastjórarnir ekki útgáfu nýrra skuldabréfa eða hlutabréfa á næstunni.

Fyrirtæki virðast samkvæmt könnuninni ætla að leggja áherslu á stækkun með innri vexti á næstu tólf mánuðum, lækkun kostnaðar, minnkun skuldsetningar, aukningu sjóðsstreymis og koma með nýjar vörur. Helmingur svarenda telur að hagnaður íslenskra fyrirtækja muni standa í stað á árinu 2014 í samanburði við síðasta ár en 38 prósent þeirra telja að hagnaður muni aukast. Þeir gera ekki ráð fyrir að auka áhættu í efnahagsreikningum fyrirtækja á þessu ári.

Meirihluti fjármálastjóranna er bjartsýnn um hagvaxtarhorfur á Íslandi til næstu tveggja ára en stór hluti telur að hagvöxtur muni standa í stað.

Spurt var um mat fjármálastjóra á Úrvalsvísitölu Kauphallar Íslands og töldu 63 prósent þeirra að vísitalan myndi hækka nokkuð á árinu. Aðspurðir um stýrivexti Seðlabanka Íslands telur yfirgnæfandi meirihluti þeirra stýrivextina of háa.

Af þeim fjármálastjórum sem svöruðu könnuninni eru 30 prósent í smá- eða heildsölu, 18 prósent í þjónustu eða ráðgjöf og 11 prósent í banka-, fjármála-, trygginga- eða byggingarstarfsemi.