Aðfluttir dragi úr launaskriði

Þegar framleiðsluslakinn hverfur úr hagkerfinu í lok þessa árs eða í byrjun næsta er hætta á að launaþrýstingur skapist á vinnumarkaði. Þetta kemur fram í Markaðspunktum Arion banka sem birtir voru í gær.

Þar segir að til viðbótar við launaskrið á vinnumarkaði sé mikilvægt að kjarasamningar þróist með þeim hætti að launahækkanir verði hóflegar. Að öðrum kosti sé hætta á að Seðlabankinn neyðist að grípa til aðhaldsaðgerða til að vega á móti þeirri þróun í lok þessa árs. Á sama hátt minnka líkur á gerð langtímakjarasamninga í byrjun næsta árs líkt og stefnt hefur verið að.

„Árið 2013 var fyrsta árið síðan 2008 þar sem fjöldi aðfluttra var umfram brottflutta. Fjöldinn var um 1.600 manns og á sama tíma fór skráð atvinnuleysi undir jafnvægisatvinnuleysi. Það er því ljóst að staðan á vinnumarkaði ræður miklu um flutning vinnuafls til og frá landinu og má leiða líkur að því að innflutningur vinnuafls geti haft jákvæð áhrif og dregið úr líkum á of miklu launaskriði þegar atvinnuleysi fer lækkandi,“ segir í Markaðspunktunum.

Telur greiningardeild Arion banka að ef atvinnuleysi fer áfram lækkandi og umframeftirspurn myndast á vinnumarkaði í einstaka geirum geti aðflutta vinnuaflið dregið úr þeim launaþrýstingi sem annars kunni að myndast.