Fáum eitt skot og það verður að heppnast

„Ég held að það sé mikilvægt að menn hafi það í huga að þetta er mjög stórt og flókið mál, þarna fáum við eitt skot og það verður að heppnast," sagði Már Guðmundsson seðlabankastjóri, á fundi efnahags- og viðskiptanefndar Alþingis í morgun.

Guðmundur Steingrímsson, nefndarmaður í efnahags- og viðskiptanefnd Alþingis og formaður Bjartar framtíðar, hafði þá spurt Má hvort Seðlabankinn teldi að vinna samkvæmt áætlunum um afnám gjaldeyrishafta gengi vel, hvort hún mætti ganga hraðar og hvaða veruleiki tæki við að loknum höftum. 

Már sagðist hafa verið á þeirri skoðun í nokkurn tíma að ekki sé tímabært að birta endurskoðaða áætlun um losun haftanna fyrr en niðurstaða liggur fyrir um það með hvaða hætti bú föllnu bankannna verða gerð upp.  

„Áætlunin lítur svo öðruvísi út eftir því hvernig því máli lyktar. Það er heilmikil vinna í gangi hvað það varðar að greina alveg til enda horfur varðandi gjaldeyrisjöfnuð Íslands og alla þá möguleika sem kæmu til greina varðandi lok þess máls. Svo er mikil vinna við að greina þá lagalega. Þetta er ekki komið á það stig að hægt sé að segja tökum þennan kostinn eða annan. Ég held að það sé mjög mikilvægt að allir hafi í huga að þetta er mjög stórt og flókið mál," sagði Már.