„Greiningin á stöðunni fól í sér mikið vanmat“

„Það er búið að eiga sér stað mjög mikil vinna í því að greina stöðuna varðandi afnám gjaldeyrishafta,“ sagði Sigmundur Davíð Gunnlaugsson, forsætisráðherra, sem var gestur í þættinum Reykjavík Síðdegis á Bylgjunni í dag.

„Menn rekur kannski minni til þess að það kom í ljós árið 2012 að greiningin á stöðunni fól í sér mikið vanmat. Nú er búið að leiðrétta það og búið að greina stöðuna. Það er komin til starfa ráðgjafahópur fyrir ríkisstjórnina sem hefur unnið mjög gott starf og því er þetta allt saman vel kortlagt.“

Sigmundur sagði að væntingar vogunarsjóða ættu því að vera raunhæfari fyrir vikið.

„Við höfum meðal annars séð lækkun á verðmati krafnanna. Ef maður skoðar verðmæti þessara krafna og leggur það saman þá kemur ljós að það er töluvert lægra en verðmæti eigna þrotabúanna. Það segir okkur að menn verði að gera sér grein fyrir því að það þurfi að vera til staðar einhverskonar svigrúm þegar þetta er gert upp.“

Sigmundur segir að það sé full ástæða til þess að menn geti farið að komast að niðurstöðu í málinu.

„Niðurstaða ætti því að leyfa afléttingu haftanna samhliða myndun þessara svigrúms og það skiptir mjög miklu máli. Varðandi Evrópusambandið má í raun segja að það var alveg ljóst að menn voru árum saman að bíða eftir því að Ísland færi inn í sambandið og því næst yrðu tekin lán í evrum frá evrópska seðlabankanum og þannig yrði skuldirnar borgaðar út. Með því hefðum við verið að færa vanda þessara föllnu banka yfir á skattgreiðendur.“

Sigmundur sagði að það væri hreinlega ekki valkostur núna og við gætum fyrir vikið farið að einbeita okkur að sókn á öðrum sviðum.

Hlusta má á viðtalið í heild sinni hér.