Litlar bruggverksmiðjur gætu átt erfitt uppdráttar

Skiptar skoðanir eru meðal bjórframleiðenda um framlagningu frumvarps Vilhjálms Árnasonar þess efnis að gera sölu bjórs og léttvíns frjálsa á Íslandi.

Vilhjálmur Árnason, þingmaður Sjálfstæðisflokksins, hefur tilkynnt ætlun sína um að leggja fram frumvarp á haustþingi um afnám einkaleyfis ÁTVR á sölu léttvíns og bjórs. Sams konar frumvarp lagði Sigurður Kári Kristjánsson fram veturinn 2007-2008. Þá voru fjórir núverandi ráðherrar Sjálfstæðisflokksins meðflutningsmenn Sigurðar.

Agnes Sigurðardóttir, einn eigenda Bruggsmiðjunnar á Árskógssandi sem bruggar Kalda, er hrædd um að Íslendingar muni taka nokkur skref aftur á bak verði frumvarpið samþykkt. Margar litlar bruggverksmiðjur muni líklega eiga erfitt uppdráttar að hennar mati.

„Við sjáum að þjónustan sem vínbúðirnar veita í dag er frábær og þær eru hvorki að hygla okkar vörum né annarra. Einnig hefur myndast mikil fagmennska innan vínbúðanna sem myndi hverfa. Það sem er hvað erfiðast er að þegar stóru matvörukeðjurnar eru komnar inn á þennan markað þá munu þær taka inn mikið magn af bjór á hagstæðu verði sem við getum ekki keppt við,“ segir hún.

Agnes telur að hún muni sakna vínbúðanna eins og þær eru í dag.

„Í vínbúðunum eru allir jafnir, það er það sem skiptir svo miklu máli fyrir okkur litlu framleiðendurna. Flutningskostnaður leggst jafnt á alla og búseta einstaklinga skiptir ekki máli þegar kemur að því að kaupa vöruna okkar. Margir útlendingar sem við höfum rætt við öfunda okkur af því kerfi sem við búum við í dag,“ segir Agnes.

Dagbjartur Arilíusson, forstjóri bruggverksmiðjunnar Steðja í Borgarfirði, er ekki sömu skoðunar og Agnes og átelur vinnubrögð ÁTVR.

„Við höfum velt þessu fyrir okkur. Fyrstu viðbrögð einkenndust af hræðslu við breytingarnar, þar sem við myndum eiga erfitt með að komast inn í lágvöruverðsverslanir. Hins vegar finnst okkur hjá Steðja vínbúðirnar ekki vera að sinna íslenskri framleiðslu nógu vel. Okkur gengur erfiðlega að komast í allar verslanir á vegum ÁTVR eins og okkur þykir eðlilegt,“ segir Dagbjartur.

„Á meðan við komumst ekki í allar verslanir þá höfum við þannig séð engu að tapa og við myndum halda áfram með okkar árstíðabundna bjór.“