Hundruð Íslendinga greiða fyrir vörur með snjallsímanum einum

Eflaust kannast einhverjir við komast að því við búðarkassann að veskið hafi verið skilið heima. Nú er lausn í sjónmáli. Smáforritið Pyngjan gerir fólki kleift að greiða með snjallsímanum en forritið er það fyrsta sinnar tegundar á Íslandi. Það að gleyma veskinu heima þarf því ekkert endilega að vera neitt tiltökumál. Forritið, sem kom á markað fyrir tæpum mánuði, er hægt og bítandi að sækja í sig veðrið, en þegar hafa sex hundruð manns nýtt sér þessa nýjung hérlendis. Um helmingur Íslendinga gengur með snjallsíma í vasanum og nýtist þetta því stórum hópi fólks

En upp á hvaða möguleika býður slík þjónusta?

„Einn möguleiki er að hraða afgreiðslu eins og ísbúðirnar hafa gert. Þær bjóða notendum að skanna inn QR-kóða og greiða fyrir ísinn áður en komið er inn í ísbúðina. Þannig er hægt að ganga beint að afgreiðsluborðinu og fá ísinn afhentan. Þannig að þetta flýtir og er til þæginda fyrir notendur,”segir Dagný Halldórsdóttir, framkvæmdastjóri DH samskipta.

Dagný segir þetta vera verslunarmáta framtíðarinnar. Þróun Pyngjunnar tók tvör ár en fór í loftið í júní. Þegar hafa sex hundruð manns nýtt sér smáforritið. en fjórir söluaðilar bjóða upp á þessa lausn á ellefu stöðum í Reykjavík og í Reykjanesbæ. 

En er hægt að treysta þessu? Hverjar eru hætturnar?

„Það er lagt mjög mikið upp úr öryggismálum í þessari greiðslulausn eins og öllum öðrum greiðslulausnum. Allar tæknilegar ráðstafanir eru gerðar til að öryggi verði eins og best verður á kosið. Við teljum þetta mjög örugga greiðsluleið og munum fá það vottað innan skamms að uppfylla alla staðla á þessu sviði sem gerðir eru til greiðslulausna.“

Það er leikur einn að nota Pyngjuna. Hægt er að ná í forritið í netverslunum Android og Apple. því næst eru kortaupplýsingar slegnar inn og forritið virkjast.

Forritið er hægt að nota á kaffihúsum Kaffitárs og segir rekstrarstjóri þar á bæ Pyngjuna nýtast bæði söluaðilum og kúnnum og telur það hafa flýtt fyrir afgreiðslu umtalsvert

„Þetta einfaldar afgreiðsluna og flýtir fyrir og býður upp á möguleika sem annars eru ekki fyrir hendi. Við sjáum að þetta fækkar handtökum starfsmanna við afgreiðsluna og gefur okkur þá frekar tækifæri til að eiga betra spjall við viðskiptavininn,“ segir Lilja Pétursdóttir, rekstrarstjóri kaffihúsa Kaffitárs.