Vatn og sölt unnin úr svínahlandskrapi

Fyrirtækið ThorIce seldi nýverið stóra ískrapavél til Hollands, sem nota á til hreinsunar á svínaþvagi á svínabúi. Umrædd vél er þróuð fyrir fiskiðnað og hefur verið notuð hér á Íslandi sem og víða um heim á undanförnum tíu árum. Hún framleiðir ískrapa úr svínaþvagi, en þegar ísinn hefur verið síaður frá og bráðnar er hann nánast hreint vatn. Aðferðina væri einnig hægt að nota til hreinsunar á kúaþvagi.

„Við höfum alltaf haldið því fram að það sé umhverfismál að fara vel með fiskinn, að kæla hann vel svo hann endist lengur. Til þess er búnaður okkar í skipum og fiskvinnslum notaður. Þarna erum við komnir inn í annan hluta af umhverfismálum, með því að hreinsa þvag svo úr verði nánast hreint vatn,“ segir Þorsteinn Ingi Víglundsson, stofnandi og framkvæmdastjóri ThorIce.

Þorsteinn og samstarfsmenn hans hjá ThorIce hafa skoðað markaði fyrir þessa tækni í Evrópu. „Markaðurinn fyrir hreinsun svína- og nautgripaþvags er alveg geysilega stór. Ef þetta er ekki hreinsað og, sem dæmi, borið beint á tún, fer þetta út í umhverfið. Markmiðið með þessari notkun vélarinnar er að skilja söltin í þvaginu frá og bóndinn getur svo selt þau sem afurð. Þar að auki er hægt að hreinsa vatnið með geislun og setja það út í umhverfið eða aftur til skepnanna.“

„Þetta er í fyrsta sinn sem okkar vélar eru notaðar í þessum tilgangi, en þörfin er alveg rosaleg og við sjáum mikil tækifæri í Evrópu. Evrópusambandið er að leggja mikla á áherslu á hreinleika vatns og vatnshreinsun. Þar eru Hollendingar líklegast harðastir, því þeir eiga lítið af grunnvatni. Kaupendurnir voru búnir að skoða marga framleiðendur svipaðs búnaðar og við erum með. Við þóttum henta vel og vélin hefur reynst mjög vel.“

ThorIce hefur fengið styrk frá Tækniþróunarsjóði meðal annars til þess að þróa vélar sem nota umhverfisvæna kælimiðla sem ekki skaða umhverfið. Þorsteinn segir stuðning Tækniþróunarsjóðs vera ómetanlegan fyrir svona fyrirtæki sem er að þróa vörur fyrir alþjóðlegan markað, en yfir 85% af sölu fyrirtækisins eru erlendis.

Vélar ThorIce eru þegar mikið notaðar í Hollandi í litlum bátum og stærstu sjávarútvegsfyrirtækjum landsins. Einnig hefur vél frá fyrirtækinu verið notuð á Hróarskelduhátíðinni í Danmörku til að framleiða krapadrykki fyrir gesti. Í sumar var stærstur hluti framleiðslu fyrirtækisins fluttur til Íslands og starfsfólki fjölgað.