Advania sér um upplýsingatæknina fyrir Akureyrarbæ

Advania og Akureyrarbær hafa undirritað samning um að fyrirtækið taki að sér rekstur og framþróun á upplýsingatæknikerfum bæjarins og stofnana hans til næstu fimm ára. Þetta kemur fram í fréttatilkynningu frá Advania.

Þar segir að markmið samningsins sé að auka ávinning og hagræði Akureyrarbæjar og íbúa af notkun upplýsingatækni.

„Samningurinn felur í sér að Advania tekur að sér rekstur og hýsingu á miðlægum kerfum, ásamt því að sjá um gagnageymslur bæjarins, gagnaafritun, eftirlit með kerfum, netsamband og Internetþjónustu. Jafnframt mun Advania þjónusta 1.200 starfsmenn bæjarins við tölvunotkun þeirra," segir í tilkynningunni.