365 og Tal ræða sameiningu

Viðræður hafa staðið yfir milli 365 miðla ehf. og IP-fjarskipta ehf. (Tal) um sameiningu félaganna undir merkjum 365. Viljayfirlýsing þess efnis hefur verið undirrituð.

Slík sameining yrði háð samþykki Samkeppniseftirlitsins og Póst- og fjarskiptastofnunar. Verði af sameiningunni munu eigendur Tals, meðal annars Auður I, fagfjárfestasjóður sem er í rekstri hjá Virðingu, eignast hlut í 365 miðlum.

365 miðlar hafa lýst því yfir að félagið ætli sér inn á fjarskiptamarkaðinn af fullum krafti og hefur fyr­ir­tækið meðal ann­ars hafið sölu á netteng­ing­um fyr­ir heim­ili. Áformað er að hefja 4G farsímaþjón­ustu á kom­andi miss­er­um.

Sævar Freyr Þráinsson, forstjóri 365, segir að góður gangur sé í viðræðunum. ,,Við sjáum tækifæri í sameiningu félaganna. Tal hefur komið sér vel fyrir á markaðnum og þar innan dyra er mikil reynsla og þekking sem við hjá 365 munum geta nýtt okkur á fjarskiptamarkaðnum.“

Fram kom á fundi Sævars með starfsfólki 365 þar sem fyrirhugaðar breytingar voru kynntar að óskað verði eftir flýtimeðferð hjá Samkeppniseftirlitinu og Póst- og fjarskiptastofnun. Vonir stæðu til að samruninn gæti gengið í gegn með haustinu.

Sævar segir miklar breytingar framundan á dreifingu sjónvarpsefnis þar sem snjalltæki séu í auknum mæli að taka við hlutverki hinna hefðbundnu myndlykla. Mikilvægt sé því fyrir 365 að tileinka sér nýja tækni í dreifingu sjónvarpsefnis.

Petrea I. Guðmundsdóttir, framkvæmdastjóri Tals, tekur undir með Sævari. Hún segir að í kjölfar þessarar sameiningar verði unnt að bjóða skemmtilegar nýjungar, sem ekki hafi sést áður á fjarskiptamarkaðnum, neytendum til hagsbóta.

„Ég er sérstaklega ánægð fyrir hönd núverandi viðskiptavina Tals sem mun með sameiningu þessara tveggja félaga gefast kostur á fjölbreyttari og vonandi enn betri þjónustu,“ segir Petrea.

Gengið hefur verið frá því við Petreu að hún flytji sig yfir til 365 og taki sæti í framkvæmdastjórn fyrirtækisins.

Ekki verða gefnar frekari upplýsingar á meðan möguleg sameining er til skoðunar hjá eftirlitsstofnunum.