Lífið

Óku spölkorn á Range Rover í Bláa lónið

Jóhann Óli Eiðsson skrifar
Hér láta hjónin fara vel um sig meðan á heimsókn þeirra stendur.
Hér láta hjónin fara vel um sig meðan á heimsókn þeirra stendur. vísir/ernir
Þyrla flutti hjónin og stórstjörnurnar, Beyoncé og Jay Z, úr Úthlíð í Bláa lónið í gær. Heimildarmaður sá þyrluna lenda með hjónin spölkorn frá lóninu fimmtán mínútur fyrir fjögur í gærdag. Þar biðu tvær Range Rover-bifreiðar, önnur svört og hin hvít, sem fluttu gestina spottann sem eftir var í Bláa lónið.

Talið er að tónlistarfólkið hafi komið hingað til lands á mánudagskvöld með einkaþotu frá Teterboro-flugvellinum í New York.

Þaðan héldu þau í lúxussumarhús í Úthlíð í Biskupstungum. Sumarhúsið er feiknastórt og óstaðfestar sögur herma að ekki ómerkari maður en Roman Abramovich, rússneskur auðjöfur og eigandi enska knattspyrnuliðsins Chelsea, hafi dvalið þar. Ljósmyndari Fréttablaðsins náði myndum af þyrlu sem lent hafði verið við húsið en komst ekki nær sökum öryggisgæslu.

Fram kom á Vísi í gær að tilefni heimsóknarinnar er afmæli rapparans Jay Z en hann verður hálffimmtugur á morgun. Samkvæmt óstaðfestum heimildum eru erlendar stórstjörnur úr ýmsum geirum að streyma til landsins til að fagna tímamótunum með hjónunum. Talið er að um sextíu fyrirmenni muni mæta í veislu sem haldin verður, allt frá leikkonunni Kate Hudson til söngvarans Robins Thicke.

Ljósmyndarar landsins hafa flestir vopnast flössum og aðdráttarlinsum en erlendar fréttasíður eru tilbúnar að borga milljónir fyrir myndir af parinu hér á landi. Upphæð fyrir mynd úr fjarlægð getur numið rétt rúmri milljón en nái einhver góðum myndum úr stjörnum prýddri veislunni er líklegt að þær geti skilað sér í tugmilljóna tékka.

Þetta er ekki í fyrsta skipti sem Beyoncé og Jay Z eru hér á landi en þau dvöldu hér næturlangt í janúarmánuði 2008. Þau gistu þá á Hótel Keflavík.

Ekki er vitað hvenær þau hyggjast hverfa af landi brott.


Tengdar fréttir

Beyonce og Jay-Z í Bláa lóninu

Bandaríska ofurparið Beyoncé og Jay-Z eru eins og fram er komið á landinu. Ætla þau að halda upp á 45 ára afmæli rapparans sem hann fagnar þann 4. desember.






Fleiri fréttir

Sjá meira


×