Vill byggja húsnæði fyrir Krónuna í Hafnarfirði

Eignarhaldsfélagið Festi hf. vill byggja um 2.300 fermetra verslunarhúsnæði við Flatahraun í Hafnarfirði og opna þar nýja Krónuverslun.

„Það er ekkert útilokað að þarna verði fleiri verslanir. Það fer eftir áhuga þeirra aðila en það er ekkert sjaldgæft að í kringum búðirnar okkar séu bakarí, fiskbúðir eða veitingastaðir,“ segir Jón Björnsson, forstjóri Festi.

Skipulags- og byggingaráð Hafnarfjarðar samþykkti í síðustu viku að heimila félaginu að vinna tillögu að breytingu á deiliskipulagi á lóðinni Flatahrauni 13. Tvær af verslunum Krónunnar eru þegar í bænum. Önnur stendur við Reykjavíkurveg en hin við Hvaleyrarbraut.

„Verslunin við Reykjavíkurveg er orðin mjög þröng og það væri ákjósanlegra að finna henni hentugra húsnæði. Henni verður því lokað en hin verður áfram á sínum stað,“ segir Jón.

„En við þurfum fyrst að fá þetta samþykkt og þetta þarf að passa inn í bæjarmyndina. En málið er nú í þeim farvegi að við erum enn að senda inn teikningar og ákveða hvernig aðkoman að þessu verður fyrir bíla, reiðhjól og fótgangandi,“ segir Jón.

Festi, sem er í eigu SFV slhf., keypti Kaupás ehf. að fullu af Norvik hf. í febrúar síðastliðnum og tók þá við rekstri verslana Krónunnar, Nóatúns og Kjarvals. Jón segir áform fyrirtækisins í Hafnarfirði ekki merki um að nýir eigendur ætli í auknum mæli að færa verslanir Krónunnar í stærra húsnæði.

„Við erum ekkert að setja áherslu á fermetrafjöldann og að vera með stórar verslanir. Það hentar á vissum stöðum við umferðaræðar og í útjaðri byggðar þar sem er meiri atvinnustarfsemi en íbúðir. En öll skipulagsmál vísa til þéttari byggðar og við rekum einnig búðir í þéttri byggð og ætlum að halda því áfram.“