Atvinnuleysi minnkar

Á öðrum ársfjórðungi voru að meðaltali 11.300 manns án vinnu og í atvinnuleit. Það samsvarar 5,9 prósentum vinnuaflsins. Hjá konum mældist atvinnuleysi sex prósent og hjá körlum 5,9 prósent. Þetta kemur fram á vef Hagstofu Íslands.

Borið saman við sama ársfjórðung í fyrra, hefur atvinnulausum fækkað um 1.600 eða 0,9 prósentustig.

Þá fækkar langtímaatvinnulausum, 12 mánuðir eða lengur, lítilega. Á öðrum ársfjórðungi höfðu um 1.800 manns verið atvinnulausir í 12 mánuði eða lengur. Samanborið við 2.000 á sama tímabili í fyrra. Það samsvarar 1,1 prósent lækkun.

Að jafnaði voru 189.900 manns á aldrinum 16-74 ára á vinnumarkaði á ársfjórðunginum og fjölgaði þeim um 0,8 prósent. Það samsvarar 83,1 prósenta atvinnuþátttöku.