HS Orka vill losna undan samningi um orkusölu til Norðuráls

HS Orka vill losna undan orkusölusamningi sem fyrirtækið undirritaði við Norðurál í apríl 2007 og hefur því hafið gerðardómsferli. Orkufyrirtækið byggir mál sitt á því að ákvæði samningsins, sem er upp á 150 megavött af orku, hafi ekki verið uppfyllt og hann því fallið úr gildi.

Frá þessu er greint í Kjarnanum. Þar er vísað í hálfsársuppgjör HS Orku og Century Aluminum, móðurfélags Norðuráls, og bent á að ef HS Orka vinnur málið megi teljast fullvíst að ekkert verði af áformum um álver í Helguvík. Norðurál sé ósammála málsrökum HS Orku og ætli að taka til varna. Búist sé við að málareksturinn geti tekið allt að eitt og hálft ár en HS Orka hefur ekki getað, og mun þangað til ekki geta, selt orku til annarra kaupenda á meðan samningurinn er í gildi.

Í Kjarnanum er einnig rifjað upp að Norðurál og HS Orka hafa áður farið fyrir gerðardóm þegar móðurfélag álframleiðandans á Grundartanga stefndi HS Orku í Svíþjóð fyrir fjórum árum síðan. Þá hafi niðurstaðan verið sú að samningurinn ætti að standa með þeim skilyrðum að hann skilaði orkufyrirtækinu viðunandi arðsemi.