Viðskipti innlent

Hvalur greiddi tæpan milljarð króna í arð

Haraldur Guðmundsson skrifar
Starfsmenn Hvals veiddu 134 langreyðar árið 2013.
Starfsmenn Hvals veiddu 134 langreyðar árið 2013. Vísir/Vilhelm

Stjórn Hvals hf. ákvað í vor að greiða út rúmar 986 milljónir króna í arð til eigenda félagsins. Hvalur hagnaðist um rúma tvo og hálfan milljarð króna í fyrra og batnaði afkoman þá um 1,8 milljarða milli ára.

Þetta kemur fram í nýbirtum ársreikningi Hvals sem nær yfir tímabilið frá 1. október 2012 til septemberloka 2013.

„Stór hluti af þessum hagnaði er vegna eignarhluta í HB Granda og Hampiðjunni,“ segir Kristján Loftsson, forstjóri Hvals.

Eignarhlutirnir sem Kristján vísar til eru í eigu Vogunar hf. Heildartekjur Hvals af 99 prósenta eignarhlut í Vogun námu rúmum 2,3 milljörðum króna á umræddu tímabili.

Eigendur félagsins voru 110 talsins í septemberlok 2013. Fiskveiðihlutafélagið Venus hf. var stærsti hluthafinn með 39,5 prósenta hlut en félagið er meðal annars í eigu Kristjáns, Birnu Loftsdóttur og Sigríðar Vilhjálmsdóttur.

Kristján Loftsson

Eignir Hvals við lok reikningsársins námu rúmum 20 milljörðum króna en skuldirnar alls 5,3 milljörðum. Birgðir af frystum hvalaafurðum voru þá metnar á 1,8 milljarða. Í ársreikningnum er einnig tekið fram að félagið hafi átt birgðir af lýsi og mjöli sem voru ekki metnar til verðs.

„Þú hefur ekki getað flutt inn hvalaafurðir til Evrópusambandsins síðan 1981. Við seldum lýsið alltaf þangað á sínum tíma. Það eru tvö lönd sem við getum flutt afurðir okkar til og það eru Noregur og Japan. Núna brennum við lýsinu öllu bara á bátunum hjá okkur út af öllum þessum hvalalátum,“ segir Kristján.

Einnig er rifjað upp í ársreikningnum að Hvalur hafi á árunum 1986-1989 stundað hvalarannsóknir samkvæmt samningi við Hafrannsóknastofnun. Félagið hafi til viðbótar lagt í kostnað við hvalamerkingar og rannsóknir utan samnings. Kostnaðurinn nam 176 milljónum króna miðað við verðlag í september í fyrra.

„Það var verið að merkja hvali hérna á árum áður með sérstökum merkjum og við lögðum til bátana í það. Við tókum saman olíukostnaðinn og launin við þetta og skelltum þessu inn svo það væri hægt að vísa í þetta."



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
ARION
2,11
26
629.105
LEQ
1,44
1
591
MAREL
0,96
31
765.014
SKEL
0,91
2
24.990
REGINN
0,88
5
68.075

Mesta lækkun dagsins


Félag
Br.%
Fjöldi
Velta*
ICEAIR
-6,35
34
336.722
HAGA
-2,73
7
74.017
VIS
-1,02
10
119.531
HEIMA
-0,88
5
13.362
ORIGO
-0,57
3
12.922
Velkomin á Vísi. Þessi vefur notar vafrakökur. Sjá nánar.