Svíar borga minna en við

Bjórinn Bríó er um hundrað krónum ódýrari í áfengisverslun sænska ríkisins en í verslunum ÁTVR. Hér kostar lítil flaska af bjórnum 329 krónur en 233 krónur í Svíþjóð.

Bríó hefur verið seldur í áfengisverslun sænska ríkisins, Systembolaget, frá síðustu mánaðamótum. Hann er bruggaður hér á landi af Borg brugghúsi sem er í eigu Ölgerðarinnar.

Andri Þór Guðmundsson, forstjóri Ölgerðarinnar, segir það líklegt að áfengisgjöld og aðrir skattar séu lægri í Svíþjóð sem skýri verðmuninn á milli landanna.

„Ég held að álagningin sé sambærileg á milli landa á heildsölustiginu en eftir því sem ég best veit eru meiri álögur hér en í flestum öðrum löndum. Heilt yfir fara tveir þriðju af útsöluverði bjórs til ríkisins með einum eða öðrum hætti. Það felst í áfengisgjöldum, virðisaukaskatti og álagningu ÁTVR,“ segir Andri og heldur áfram:

„Ef við tökum ýktasta dæmið þá fara um 90 prósent af verði Tindavodka til ríkisins. Ég held að ég geti fullyrt að það sé ekkert annað ríki með álíka álögur á áfengi. Þetta gerir það að verkum að verð á milli landa er ekki samanburðarhæft.“

Örn Héðinsson, framkvæmdastjóri Ölvisholts brugghúss, sagði í Fréttablaðinu í október síðastliðnum að áfengisgjöld ríkisins hefðu ýtt fyrirtækinu út í aukinn útflutning. Markaðurinn hér heima væri orðinn hamlandi sökum skattpíningar.

Andri segir áfengisgjöldin ekki hafa stuðlað að auknum útflutningi Ölgerðarinnar.

„Útflutningsáætlun okkar byggir eingöngu á okkar áhuga á að vaxa og þessir bjórar frá Borg eru að vekja mikla athygli.“

Bríó var þróaður í samstarfi við Ölstofu Kormáks og Skjaldar. Verðmunurinn kom Kormáki Geirharðssyni, eiganda Ölstofunnar, á óvart þegar blaðamaður hafði samband við hann.

„Ég vissi ekkert af þessu og finnst þetta skrítið. Ég vildi gjarnan að Bríó væri hundrað krónum ódýrari hérna heima,“ segir Kormákur.