Verklag alltaf til endurskoðunar

„Verklag hér er alltaf til endurskoðunar og menn eru að reyna að læra af reynslunni og gera hlutina rétt,“ segir Ólafur Þór Hauksson, sérstakur saksóknari, aðspurður hvort búið sé að breyta verklagi um aðgang að gögnum embættisins.

Fréttablaðið greindi frá því í gær að fulltrúi hjá skiptastjóra Milestone hefði fengið að róta eftirlitslaus í tvo daga í gagnageymslu embættisins, þar sem frumrit málsgagna í sakamálum er að finna ásamt gögnum fleiri mála. Ólafur vill að öðru leyti ekki tjá sig um málið þar sem það er enn í gangi milli lögmanns sakbornings í Milestone-málinu og Ríkissaksóknara.

Verjandi Karls Wernerssonar gerði kröfu um að gögn málsins yrðu afhent í síðasta lagi í gær þar sem fyrirtaka verður í sakamáli gegn honum í dag. Ríkissaksóknari hefur ekki orðið við þeirri kröfu verjandans né heldur svarað fyrirspurnum fréttastofu um málið.